Uyu musaza atuye mu mudugudu wa Bwangacumu akagari ka Nyamagana mu murenge wa Ruhango, ubucuruzi bwe abukorera ku muryango w’isoko rya Kijyambere mu mujyi wa Ruhango.

Atangira akazi ke mu gitondo agataha nimugoroba kimwe n’abandi bose bakora akazi k’ubucuruzi busanzwe.

Avuga ko yatangiye ubucuruzi bwe muri 62 gusa aza kubureka kubera amikoro macye. Nyuma ya 1994 yaje kubona akazi ku karere ko gukora amasuku, ariko kaza kumunanira kubera izabukuru.

Mu mafaranga yahembwaga yagendaga yizigamaho macye, nyuma avuye mu kazi yaje kongera asubira mu bucuruzi bwe bwo gucuruza ikarito.

Kuva atangiye ubu bucuruzi bwe, ahamya ko bumaze kumugeza kuri byinshi, kuko ngo bwamurinze gusabiriza, aguramo inka, arihirira abana be amafaranga y’ishuri ndetse akanambika neza umugore we.

Hakizinka anenga cyane abantu akunze kubona bagera mu zabukuru ugasanga ubuzima bwabo babwerekeje mu kabari, ubundi bakirirwa basabiriza.

Ati “Uwo ni umuco mubi, kuko abakuze natwe turashoboye, dukwiye kwiyumvamo ubushobozi tugahanga umurimo, aho kwirirwa mu kabari kuko nta kamaro.”

Uyu mwuga akora, ubusanzwe usanga ukorwa n’abana bari munsi y’imyaka 20 batagize amahirwe yo kwiga, ariko kuba akorana nabo ashaje ngo yumva nta kimwaro bimuteye n’ubwo ashaje.

Ubu Hakizinka yamaze kwinjira muri koperative y’abacuruzi bagenzi be bacuruza takataka yitwa Duterimbere aho buri munsi abasha kuyishyuramo amafaranga 200.

Abazi uyu musaza ndetse n’abakiriya be, bemeza ko akunda akazi ke, kuko ngo iyo agakora agakorana ubushake ndetse n’abamugana akabakira neza. Bagasanga akwiye kuba icyitegererezo cya bagenzi be.

Eric Muvara