Umuyobozi w’umurenge wa Bugeshi wegereye umupaka wa Congo, avuga ko bamaze gufata abagore 9 mu bihe bitandukanye bashaka kwinjira muri Congo badafite ibyangombwa, avuga ko muri aba bagore bahagaritswe n’abaturage baturiye umupaka bahagurukiye guhagarika uwabahungabanyiriza umutekano.

Mvano Etienne uyobora umurenge wa Bugeshi avuga ko abahagaritswe bashakaga guca ku mupaka wa Gasizi, batangirwa n’abaturage bo mu mudugudu wa Bereshi ahitwa Hehu.

Nkuko byatangajwe na bamwe mu babajijwe bavuye mu karere ka Ngororero mu duce twa Kabaya na Hindiro, bavuga ko bagiye muri Congo gushaka abagabo babo muri FDLR.

Aba bagore bavuga ko bajya kureba abagabo babo bari muri FDLR kubera ko bamaze kumenya amakuru ko bigiye hafi y’umupaka w’u Rwanda aho bashobora kubabona bitandukanye n’ibihe byashize ubwo FDLR yari ikiri Walikali no mu bindi bice bya Congo kure y’umupaka w’u Rwanda.

Abaturage baturiye umupaka wa Congo bavuga ko mu ngabo za Leta ya Congo zaje mu duce M23 yavuyemo hafi y’umupaka w’u Rwanda harimo abarwanyi ba FDLR harimo n’abo bagiye babona bazi nka Capt Abudou uvuka Bugeshi mu kagari ka Njerima kandi atari wenyine.

Kuba abagore bamwe bafite abagabo muri FDLR batangiye kujya kubareba bigaragaza ko abarwanyi ba FDLR bavugana n’imiryango yabo, Mvano akavuga ko bakwiye kubahamagara bagataha aho kuguma mu mashyamba no kuza guhungabanya umutekano, ahubwo bakaza kwiyubakira igihugu.

Ubuyobozi bw’umurenge wa Bugeshi bukaba buvuga ko abafashwe bashyikirijwe inzego z’abinjira n’abasohoka na polisi ngo ikurikirane ibyabo, naho abaturage bo biyemeje guhagarika abashaka kubahungabanyiriza umutekano, ibi bikaba byaratumye hari n’abarwanyi ba FDLR bahagarikwa n’abaturage.

Sylidio Sebuharara