Umuvugizi wa Polisi y’u Rwanda, Supt. Theos Badege, atangaza ko abo bagabo baguwe gitumo n’abakoraga irondo mu mudugudu wa Nyamizi mu kagari ka Nyabagendwa mu Murenge wa Rilima aho abakoraga irondo babonye umurizo ndetse n’uruhu by’imbwa nyuma bakamenya ko inyama bokeje ari iza nyarubwana maze bahita babimenyesha polisi.

Uwitwa Ndagijimana Alexis avuga ko ariwe wagize igitekerezo cy’uko bashobora kwiba imbwa hanyuma bakazigurisha abaturage kugirango babone amafaranga. Yagize ati “ tumaze kucyuzuza twagiye kwiba iy’umugabo witwa Gatera Bosco tuyikura iwe mu rugo aho yari iri kumwe n’amatungo”.

Nyabyenda (mucoma) afite agahanga k’imbwa bishe.

Gatera wibwe imbwa avuga ko atari ubwa mbere aba bagabo bamwiba kuko ku bunani bamwibye ihene ye bakayirya.

Supt. Theos Badege avuga ko polisi ikurikiranye aba bagabo icyaha cy’ubujura buciye icyuho bwo kwiba itungo, kikaba gihanwa n’ingingo ya 400 yo mu gitabo cy’amategeko ahana y’u Rwanda.

Icyo cyaha gihanishwa igifungo kuva ku myaka itanu kuzamura ariko kuko bemera icyaha urukiko rushobora kukigabanya.

Batawe muri yombi bamaze kuryaho nke

Muganga w’amatungo mu karere ka Bugesera, Kayitankore Leonidas, avuga ko niba imbwa bariye idakingiye bashobora kurwara indwara y’ibisazi ndetse n’ababegereye bose.

Ati “ubusanzwe no kurya inyama z’irindi tungo zidakingiye ni bibi none ubwo hajemo no kurya imbwa bigiye kuba ikibazo”.

Egide Kayiranga