Muri aya matora ndetse ubuyobozi bukuru bw’umuryango RPF-Inkotanyi ntibwahindutse kuko abari basanzwe bayobora icyo bita biro politiki bose bongeye kugirirwa icyizere, maze Christophe Bazivamo wari usanzwe ari visi perezida na Ngarambe Francois wari umunyamabanga mukuru nabo bakongera gutorwa bakaguma ku buyobozi bwa RPF-Inkotanyi, kuri iyo myanya.

Muri aya matora kandi hatowe n’abakomiseri 17, barimo batanu b’urubyiruko, bagiye bashingwa imirimo inyuranye muri FPR-Inkotanyi.
Abakomiseri batowe ni Dr Pierre Damien Habumuremyi usanzwe ari ministiri w’intebe, Senateri Tito Rutaremara, James Musoni, Dr Joseph Karemera, Marie Claire Mukasine, Speciose Mukandutiye, Shehe Abdul Karim Harelimana, Robert Bayingana, Wellars Gasamagera, Amb. Valentine Rugwabiza, Monique Mukaruliza na Esperence Mwiza.

Mu rubyiruko hatowe Mukobwa Justine, Wamala Wilson, Uwamariya Francine, Nteziryayo Aloys, na Dr Utumatwishima Abdalah.

Inama nkuru y’umuryango RPF-Inkotanyi kandi yagombaga gutora abakomiseri mu nzego zihariye, arizo komite ngengamyitwarire igomba kuba igizwe n’abantu barindwi, na komite ngenzuzi y’abantu batanu.
Ubwo abayoboke ba FPR-Inkotanyi bari mu nama nkuru yatoye aba ariko abayobozi bakuru b’umuryango bifuje ko aba bakomiseri bazashingwa izi komite ngo bazatorwa na biro nyobozi.

Mu ijambo yavugiye muri iyo mihango, perezida w’umuryango RPF-Inkotanyi usanzwe ari n’umukuru w’igihugu Paul Kagame yatanze inama yo kudacika intege mu gihe umuntu azi ko arimo guharanira ibyagirira akamaro Abanyarwanda muri rusange no kwirinda kwikunda.

Yibukije abanyamuryango ba FPR ko aho kwita ku nyungu za buri muntu ku giti cye, ahubwo ngo bagomba kureba inyungu rusange.
Yanenze ko abenshi mu bagombaga kwiyamamariza kuyobora muri komite ngengamyitwarire, “batinye iyo myanya kubera ko biyiziho imyitwarire mibi no gukunda imyanya yoroshye, hanyuma bagatangira kwivuga ibigwi”.

Perezida Paul Kagame yagize ati “Aho kugira ngo wivuge ibigwi, waretse abandi bakabikuvugaho?” akomeza agira ati “Impamvu batabona ibigwi bakuvugaho kugeza ubwo wowe ubwawe ushaka kubyivugira, ni uko biba ari ntabyo. Nta bigwi biba bihari.”

Umukuru w’Igihugu yashimye uruhare rwa buri wese mu gukora inshingano ashinzwe zo kurinda igihugu no kugaragaza uruhare mu byo akora, aho ngo “abanzi babuze aho bamenera cyane cyane guhera mu mwaka ushize wa 2012, kubera ubufatanye bw’abanyamuryango ba RPF-Inkotanyi ubwabo, n’ubufatanye n’imikoranire n’indi mitwe ya politiki.

Inama nkuru ya 12 y’umuryango RPF-Inkotanyi yateranye kuri iki cyumweru, yitabiriwe n’umuyobozi wa Sena, Dr Jean Damascene Ntawukuriryayo uri mu ishyaka PSD, Umukuru w’Umutwe w’abadepite Mukabalisa Donatille, ndetse n’abayobozi b’indi mitwe ya politiki. Bakaba bijeje ko bakomeje gukorana bya hafi na RPF Inkotanyi.

Muri iyi nama nkuru ya FPR kandi abakuriye amashyaka ya PSP na PS-Imberakuri basabiyemo ko nabo ngo bahabwa imyanya mu buyobozi bwa leta. Abo ni madamu Kanyange Phoebe uyobora PSP na Mukabunani Christine uyobora ishyaka PS-Imberakuri.

Abayobozi b’andi mashyaka ya politiki akorera mu Rwanda bari bitabiriye iyo nama nkuru ya FPR. Abagaragayemo ni Dr Vincent Biruta wari uhagarariye PSD, PL ihagararirwa na minisitiri Mitali Protais, UDPR na Gonzague Rwigema, PDI na Sheikh Musa Fazil Harelimana, PDC na Agnes Mukabaranga, PPC na Dr Alivera Mukabaramba, PSR na Rucibigango Jean Baptiste, PSP na Kanyange naho PS-Imberakuri ikaba yari ihagarariwe na Mukabunani Christine.

Simon Kamuzinzi