Perezida Kagame yabitangaje kuri uyu wa gatanu tariki 26 Gashyantare 2016, mu kiganiro yagiriye muri Kaminuza ya Harvard. Bikaba byari ubwa kabiri ahatanze ikiganiro kuva Jenoside yarangira.

Perezida Kagame yatanze ikiganiro muri forumu yaberaga muri Kaminuza ya Harvard muri Leta zunze Ubumwe z’Amerika..

Yagize ati “Ubwo mperuka gutanga ikiganiro aha mu myaka 15 ishize u Rwanda nta kindi rwasobanuraga atari Jenoside. U Rwanda rwashoboye kubaho n’ubwo byari bikomeye. Icyo gihe ubutabera n’ubwiyunjye nabyo byari bitaragerwaho bikiri mu nzira.”

Yavuze ko kuva icyo gihe u Rwanda rwahindutse kandi rudateze gusubira inyuma, bitewe na gahunda zashyizweho ariko cyane cyane uguhitamo kw’Abanyarwanda ku buryo isura ya Jenoside yarangaga igihugu itakiriho.

Ikiganiro yatanze bari bagikurikiranye n’amatsiko.

Bari benshi ku buryo bamwe bagikurikieraniye inyuma y’icyumba cyaberagamo.

Gusa ngo ibyo byose ntibishobora gutuma Abanyarwanda birara kuko inzira biyemeje ikiri ndende ngo bageze igihugu aho kifuza kuba.

Yavuze ko umuntu atakwemeza ko ibigeerwaho muri sosiyete zose mu iterambere bituruka kuri demokarasi gusa.

Ati “Iterambere ntiryagerwaho abaturage badahawe imbaraga no gukora igituma ibibarimo byaguka.”

Abanyeshuri bahawe n’umwanya wo kubaza ibirenzeho.

Yagize icyo avuga ku matora aheruka mu Rwanda, imwe mu miryango mpuzamahanga yanenze, avuga ko icya ngombwa ari uko abaturage b’u Rwanda bagaragaje icyari kibari mu bitekerezo kandi bakagishyira mu bikorwa. Yizeza ko n’igihe kizagera hakaboneka undi musimbura uzakomeza kubayobora.

Ku kibazo cy’u Burundi, Perezida Kagame ntiyariye iminwa kuko yagaragaje uburyo Abarundi ari bo bagomba gufata iya mbere mu kwishakira umuti ikibazo cyabo. Ariko anagaragaza uburyo umuryango mpuzamahanga nawo watereranye iki gihugu kugeza magingo aya.