Perezida Kagame yishimiye uburyo Abanyarwanda bitabira kubaka igihugu cyabo, aho ibikorwa byo kwita ku buzima bw’abaturage, kubagezaho amashanyarazi, amazi, imihanda no kubaka amashuri mu bikorwa by’umuganda rusange, ngo byahinduye imibereho ya benshi.

Umukuru w’igihugu yatanze urugero ku mudugudu wubakwa mu kagari ka Rushehe, Umurenge wa Masaka mu karere Kicukiro, aho kuri uyu wa Gatandatu tariki 22/2/2014, nawe yatanze umuganda wo kubakira abatishoboye barimo gutuzwa muri ako kagari.

Ati:“Ndabashimira ko mwitabira ibi bikorwa muri benshi, igihugu kirimo gutera imbere kubera mwebwe; turatera intambwe buri munsi. Uwaba yari ari aha mu myaka 20 ishize, agarutse yayoberwa igihugu arimo.

Hari abantu babaye impunzi hanze, baguma bavuga u Rwanda nko mu myaka 20 ishize, abaza bahagera bakumirwa”.

Perezida Kagame asaba ko ibyagezweho bigomba kurindwa kwangirika, aho agira ati:” Hari abafite imigambi mibi bagera aha bakemera ibyo babonye; ariko hari n’abasubiranayo imigambi yo gusenya ibyo tumaze kugeraho; nicyo mvuga cyo kurinda umutekano w’ibyo tumaze kubaka; ntawe nzi wakwemera ko bamusenyera ibyo amaze kubaka.”

Yibukije ko Abanyarwanda badashobora kugira agaciro badakoze, kuko ngo umuterankunga ayitanga ahereye ku byo uyihabwa yigejejeho.

Umukuru w’igihugu ajya inama y’uburyo abantu bakwiye kwitwara mu buzima bwa buri munsi; aho asaba ko muri buri gace hajya hahingwa ibitandukanye byera neza, hanyuma abantu bagahahirana; bakihaza bakanasagurira amasoko yo mu Rwanda no mu mahanga.

Yibukije ko abantu bagomba gufata indyo yuzuye, guha abana uburere n’uburezi buboneye, kugira uruhare mu bibakorerwa; abayobozi nabo bakabikurikirana kandi ngo bagahora baharanira inyungu rusange z’abaturage babatoye.

Ati “Ibyo tumaze kubaka turifuza kubyubakiraho ibindi, ariko inzira iracyari ndende.”

Nyuma yo kubakira abatishoboye bari mu byiciro bitandukanye amazu agera kuri 200 mu mudugudu w’i Rusheshe, ngo harateganywa n’andi mazu 72 y’abakomeje kuhatuzwa, nk’uko umuyobozi w’akarere ka Kicukiro, Paul Jules Ndamage yabisobanuriye Umukuru w’igihugu.

Umudugudu w’i Rusheshe uri ku ntera y’urugendo (mu muhanda w’igitaka) rw’iminota nka 25 mu modoka, uvuye ahitwa kuri 15 (mu muhanda ujya i Burasirazuba); utuwe n’ibyiciro bitandukanye by’Abanyarwanda.

Uretse abaturage bari bahasanzwe, hari abarokotse Jenoside yakorewe abatutsi muri 1994 bamaze kuhatuzwa, abahejejwe inyuma n’amateka, abanyarwanda bari mu cyiciro cy’abakene, abamugariye ku rugamba rwo kubohora u Rwanda, abavuye aho bari batuye nabi n’abaherutse kwirukanwa mu gihugu cya Tanzania.

Bamwe mu baturage b’i Rusheshe bashima ibyo bamaze kugezwaho birimo amashanyarazi, amazi meza, ivuriro, ishuri ry’incuke, isoko ryo gucururizamo ibyo bahinga; ndetse no guhora basurwa n’abayobozi bakuru b’Igihugu.

Simon Kamuzinzi