Perezida Kagame na Buffet babitangarije mu kiganiro batanze mu Nama y’Isi ku Bukungu yiga ku mugane wa Afurika (WEF), cyari kiyobowe na Tony Blair, wahoze ari MInisitiri w’Intebe w’Ubwongereza, ku mugoroba wo kuri uyu wa Gatatu, tariki 11 Gicurasi 2016.

Inama ya World Economic Forum iteraniye i Kigali iriga kuri ejo hazaza ha Afurika; ubujiji n’ubukene byugarije uyu mugabane bikaba mu byo abanyapolitiki, impuguke, abayobozi b’imiryango n’abashoramari mpuzamahanga baturutse hirya no hino ku isi barimo kwibandaho.

Tony Blair, yabajije Perezida Kagame aho u Rwanda rugeze kuri ubu rwakiriye inama ya WEF, asubiza ko u Rwanda rutanga icyizere rushingiye ku bikorwaremezo rurimo kubaka, abaturage bumva neza akamaro ko kubibungabunga kandi bashyize hamwe ari na ko bafashanya.

Perezida wa Repubulika yagize ati “Mu gihe iwanyu mufite aho muhera mwiteza imbere, mu Rwanda byari akavuyo mu myaka 22 ishize, ariko buri wese yasabwe uruhare kugira ngo tube dufite aho tugeze.”

Umukuru w’Igihugu yasobanuye ko ibyashingirwaho kugira ngo Abanyafurika bave mu bukene, harimo kwamagana umuco wo kudahana ruswa, kongera ishoramari mu buhinzi, kubaka ibikorwaremezo birimo imihanda, amazi, amashanyarazi, inyubako, ingufu, ikoranabuhanga no kubyegereza abaturage.

Buffet asobanura impamvu yashoye imari mu Rwanda, yavuze ko ubundi abashoramari ngo bajya gukorera ahantu bameze nk’abizirikaho igisasu, ariko ngo mu Rwanda ni igihugu afitiye icyizere.

Buffet yasabye Abanyafurika kwitegura impinduka buri gihe, ati “Ikibazo si uko ibintu bimeze nabi, ahubwo ni ukwitegura gutangira kubigira byiza; ariko mu Rwanda iryo tangiriro rirahari.”

Ashimangira ko azakomeza gushora imari mu buhinzi kuko ngo ni byo akunda; akaba asanzwe atera inkunga imishinga yo kuhira imirima mu Ntara y’Iburasirazuba.

Ihindurwa ry’Itegeko Nshinga mu Rwanda na ryo ryakomojweho

Abajijwe icyo atekereza ku miyoborere y’u Rwanda nyuma ya 2017, Buffet yasubije ati “Abanyarwanda ni bo bazi icyo bashaka, ntabwo bagomba gufatirwa ibyemezo n’amahanga. Ni yo mpamvu tugomba gutegereza ejo hazaza tukareba umusaruro uzabamo.”

Avuga ko hatagendewe ku kuvuga ngo ni manda ya gatatu Perezida Kagame azaba ayoboye, ahubwo ngo hashingiwe ku byo igihugu kimaze kugeraho.

Perezida Kagame na we ntiyacecetse kuko yahakanye ko atigeze asaba guhindura Itegeko Nshinga ahubwo ko ari "gahunda n’ubusabe bw’abaturage", kandi ko babifitiye uburenganzira kwihitiramo uko bashaka.

Inama ya WEF ku iterambere ry’Afurika, iteraniye i Kigali kuva tariki 11 kugeza 13 Gicurasi 2016, yitabiriwe n’abarenga 1,200 baturutse impande zose z’isi, baraganira ku ngingo zitandukanye zijyanye n’ubukungu n’imibereho myiza y’abaturage.