Ibi yabitangaje mu kiganiro yagiranye n’abanyamakuru mu rwego rwo kuganira ku myaka 20 u Rwanda rumaze rwibohoye, cyabaye kuri uyu wa kabiri tariki 1/7/2014.

Yagize ati “Icyo twifuriza Abanyarwanda kirazwi, ntago ari ukukibifuriza ngo nabo baricaye badutezeho ko tubibaha. Kubibifuriza ni ukubifuriza kubishobora kugira ngo babyigerereho. Ntago ari ikintu bagomba kubaha abagenera yabishatse cyangwa atabishatse ntakibahe.”

Perezida Kagame yasubizaga ikibazo yari abajijwe n’umunyamakuru ku cyo yahitiramo Abanyarwanda hagati yo kubona demokarasi bakabaho nabi cyangwa bakaho neza nta bwisanzure bafite.

Yatangaje ko byose bishoboka ko Abanyarwanda babigira, bakisanzura kandi bakanabaho neza, ariko yemeza ko nta yindi nzira bizacamo atari ugukora. Yatangaje ko ahubwo icya ngombwa ari ukubaha ubushobozi bwo kugira ngo ibyo bashaka babyigezeho.

By’umwihariko iki kiganiro cyari cyitabiriwe n’abanyamakuru bo mu Rwanda, mpuzamahanga n’abo mu karere, cyagarutse ku myaka 20 u Rwanda rumaze rwibohoye. Cyagarutse kandi ku mutekano u Rwanda rugikomeza gushaka ubu, kubera FDLR igikomeza kugaragara mu karere.

Perezida Kagame yongeye gutangaza ku mugaragaro ko ubuyobozi bw’u Rwanda butazihanganira uwo ari we wese ushaka gukinira ku buzima n’umutekano w’u Rwanda.

Emmanuel N. Hitimana