Telefoni bahawe ni izo mu bwoko bwa smartphone, SAMSUNG GALAXY J1 ace.
Nyuma yo guhabwa izi telefoni, aba bayobozi bavuze ko banejejwe no kuba Perezida Kagame ari umugabo uhagarara ku ijambo rye, maze imvugo ye ikaba ingiro.

Mukamfizi Regine uyobora Akagari ka Kiyonza mu murenge wa Ngoma yabwiye Kigali Today ati:”Nyakubahwa Perezida wa Repubulika ni umugabo rwose. Imvugo ye niyo ngiro”.

Bakomeza bavuga ko izi telefoni bahawe bagiye kuzikoresha neza kandi ko zizabafasha mu kunoza akazi kabo kurusha mbere.

Venuste Habineza, Gitifu w’Akagari ka Uwumusebeya mu murenge wa Ruheru ati“Ubu tugiye kujya dutanga raporo zuzuye, zirimo amafoto n’ibindi byose. Ikindi ni uko tugize uburyo bwo kubasha guhurira n’abandi ku mbuga nkoranyambaga, ku buryo tuzajya twungurana ibitekerezo” .

Icyakora aba bayobozi bavuze ko izi telefoni zikenera umuriro mwinshi, nyamara ngo hakaba hakiri Utugari tutarageramo umuriro w’amashanyarazi, kuburyo ngo hari igihe kuzibonera umuriro bizajya bibagora.

Kuri iki kibazo ariko ubuyobozi bw’Akarere buvuga ko hari gahunda yo gukwirakwiza amashanyarazi mu tugari hose, ku buryo ngo aho utaragera bibagora igihe gito ubundi bigakemuka.

Umuyobozi w’Akarere ka Nyaruguru Habitegeko Francois yasabye aba bayobozi gukoresha izi telefoni mu kunoza akazi kabo neza, kugirango bereke Perezida wa Repubulika wazibahaye ko atazibahereye ubusa.

Ati:”Icyo tubasaba ni uko bazikoresha neza zigatanga umusaruro kuko uwazibahaye nicyo yashakaga. Ntabwo rero bagomba kugenda ngo bazitabe nka rya taranto, ahubwo bagomba kuzikoresha”.

Izi telefoni bahawe zifite agaciro k’amafaranga 112.000 y’u Rwanda, buri imwe, bakaba bazihawe ziri kumwe n’ibyangombwa byazo byose.

Nyuma yo kuzihabwa kandi hanabayeho kubanza guhugurwa ku mikoreshereze yazo, mu rwego rwo kubafasha kuzazikoresha neza.

Charles RUZINDANA.