Yabyemereye itsinda ry’abadepite bakoreye urugendo muri aka karere kuri uyu wa mbere Tariki 18 Mutarama 2016, avuga ko yahagaragaye mu minsi yashize ariko ubu itakihagaragara kuko abaturage bahatuye bejeje ibishyimbo.

Yagize ati “Hari inzara bamwe mu baturage bise “Nzamurambaho” yatewe n’uko abaturage batashoboye guhinga ngo beze cyane nk’uko byari bisanzwe mu bindi bihembwe by’ihinga.”

Yasobanuye ko iyo nzara yatewe no kuteza imyumbati bitewe n’indwara ya Kabore yarwaye mu gihe abahinzi bari biteze umusaruro.
Yavuze ko hari n’urusenda rwahinzwe mu murenge wa Rwabicuma narwo rwapfiriye abahinzi ubusa, mu gihe bari begeranyije ubutaka bagamije kuzabona amafaranga atubutse rukabahombera kubera imbuto mbi.

Yatanze icyizere ko hari ibiganiro biri hagati y’ubuyobozi bw’Akarere n’ikigo cy’Igihugu gishinzwe ubuhinzi (RAB), bigamije kugira ngo abaturage mu gihembwe cy’ihinga gitaha bazashakirwe imbuto nziza y’indobanure ishobora kwihanganira uburwayi.

Iyi nzara yiswe yagaragaye mu mirenge yo mu gice cy’amayaga ari yo Ntyazo, Kibirizi, Muyira na Busoro, nk’uko bamwe mu baturage bo muri iyo mirenge babitangaza. Bavuga ko kuyiha iryo zina byatewe n’uko nta cyizre bari bafite ko izahashira.

Mu mpera 2015 ubwo “Nzamurambaho” yari ifite ubukana ikilo cy’ibishyimbo cyari kuri 700Frw mu gihe ubu kigeze 300Frw mu isoko rya Nyanza.