Muri aya marushanwa yateguwe kandi agakurikiranwa n’Urwego rw’Umuvunyi harebwaga uburyo abaturage bagerwaho na serivise bagenerwa n’amategeko hatabayeho akarengane na ruswa.

Ubwo iri suzuma ryakorwaga mu karere ka Nyamasheke, tariki 5 Ugushyingo, umukozi w’Urwego rw’Umuvunyi wakurikiranaga akarere ka Nyamasheke yatangaje ko mu minsi y’isuzuma bagenzura niba ibyo ubuyobozi buba butangaza mu nyandiko ko bukora bihuye koko n’ukuri kw’ibikorwa.

Iki gihe kandi, ubuyobozi bw’akarere ka Nyamasheke bwadutangarije ko ibyo Urwego rw’Umuvunyi rusuzuma ari ibisanzwe mu nshingano z’abayobozi n’abakozi b’akarere ka Nyamasheke kandi ko icyari kigenderewe cyari uguha serivisi nziza umuturage, kandi ngo bakaba basanzwe babiharanira.

Umuyobozi w’akarere wungirije ushinzwe imibereho myiza, Madame Gatete Catherine yagaragazaga icyizere cyo kuzitwara neza muri aya marushanwa kandi akavuga ko aka karere gahora gashaka kugana aheza kurushaho.

Akarere ka Nyamasheke kaje ku mwanya wa kabiri muri aya marushanwa gakurikiye akarere ka Gisagara ko mu Ntara y’Amajyepfo kegukanye umwanya wa mbere ku rwego rw’Igihugu.

Emmanuel Ntivuguruzwa