Urupfu rwa Nyiraneza rwamenyekanye ubwo umugabo we Muhire Faustin yatabazaga abayobozi b’umudugudu avuga ko asanze umugore we yiyahuye.

Bamwe mu baturanyi ariko bakeka ko Muhire ari we waba yiyiciye umugore we kuko ngo bari basanzwe bafitanye amakimbirane umugore amushinja ubusambanyi.

Bo bavuga ko bigaragara ko nyakwigendera yamanitswe amaze kwicwa kugira ngo bizavugwe ko yiyahuye, ngo bikaba bishoboka ko umugabo we yaba yamaze kubikora agakinga akabona kujya guhuruza.

Uhagarariye Umunyamabanga Nshingwabikorwa w’Umurenge wa Kanjongo, Emmanuella Mukama, avuga ko bamenye iyo nkuru kuri uyu mugoroba bakihutira gutabara.

Agira ati “Ni byo koko Nyirazaninka yasanzwe mu nzu yapfuye, ntituramenya icyaba cyamuhitanye. Niba koko yiyahuye cyangwa se yishwe tuzabimenya ubwo polisi izaba irangije iperereza”.

Abakekwa muri uru rupfu rwa Nyirazaninka uko ari bane barimo umugabo we ndetse n’uwo mugore bafata nk’ihabara rye, bahise batabwa muri yombi ubu bakaba bafungiye kuri Sitasiyo ya Polisi ya Kanjongo.

Umurambo wa nyakwigendera wajyanywe mu bitaro bya Kibogora gukorerwa isuzuma mu gihe iperereza rigikomeza ku cyaba cyahitanye uwo mugore.

Umugwaneza Jean Claude