Nduwamungu avuga ko yibuka ko Jenoside yabaye baba aho bita ku Kimicanga akibuka ko papa we yitwaga Ngango Jean Marie Vianney akaba yari umwarimu mu mashuri abanza muri Ste Famille naho mama we akaba yaritwaga Mukarubuga Vestine, baririrwanaga mu rugo.

Mu gihe ngo amasasu yari abaye menshi yumvise papa we avuga ngo aratabaye, amaze kugenda abantu baraje bafata nyina bukeye mu gitondo baramutwara.

Kuva icyo gihe ntiyongeye guca nyina iryera, ngo yumvaga bamutwaye bamubwira ko agomba kubazwa aho umugabo we ari bakamubwira ko ngo yagiye mu Nkotanyi.

Umwe mu baturanyi niwe watwaye uwo mwana Nduwamungu, kuko yabonaga nyina bamujyanye, bahita bahungira ku kiliziya ya Saint Michel.

Impunzi zabaga Saint Michel zaje gusohoka ziruka ngo abantu bari kuziteramo amabuye bakomeza bahunga, akomezanya n’abantu bajyaga mu karere ka Nyamasheke.

Ageze muri Nyamasheke yahahuriye n’umugira neza witwa Mukanyegamo Faina nibwo yatangiye kurerwa n’uwo muryango kugeza magingo aya.

Mukanyegamo avuga ko yamutoraguye aho bita kwa furere agasanga yarabyimbye amaguru, akaza no kumutwara muri Kongo bahunga bakaza kugarukana.

Nduwamungu asaba umuntu wese wamenya amaherezo y’ababyeyi n’aho bari batuye kuba yamubwira akamenya niba barapfuye cyangwa se bakiriho ndetse akaba yabasha kwibukiranya aho bari batuye.

Nduwamungu avuga ko yigeze kujya ku Kimicanga ngo acishirize arebe ko yamenya aho iwabo bari batuye arahayoberwa kuko yabonaga harahindutse kandi nta muntu abona ngo abe yamwibuka.

Umugwaneza Jean Claude