Ibi bisubizo birimo kongera ibyapa biburira abayobozi b’ibinyabiziga, kwimura abaturage baturiye hafi y’ahantu bashobora kujya mu kaga ndetse no gushyira ho ibyuma birinda imodoka kurenga umuhanda.

Ibi ni bimwe mu byavuye mu rugendo umunyamanga wa Leta muri minisiteri y’ibikorwaremezo, Dr Nzahabwanimana Aléxis yagiriye mu Karere ka Nyamasheke ku wa 20-21 Mata 2015.

Byari bimaze kumenyerwa ko impanuka ziba umunsi ku munsi muri Pariki y’igihugu ya Nyungwe no mu nkengero zayo ahanini zigakorwa n’ibimodoka binini by’abanyamahanga baba bapakiye ibintu bitandukanye akenshi baba bagemuye muri Repuburika iharanira Demukarasi ya Kongo.

Abatwara izi modoka bakunze kugaragaza ko bakora izi mpanuka kuko banyura muri Nyungwe bakata amakorosi menshi kandi bikaba bitoroshye guhagararamo kuko nta tumanaho rihaba.

Ibi ngo byatumaga barisoza amapine yashyushye bigakubitana n’ahantu hahanamye baca basohotse muri Nyungwe hataba icyapa na mba kibaburira, bakagera mu Gisakura babuze amaferi bagakora impanuka gutyo.

Nyuma y’ibi bibazo bitandukanye byagiye bivugwa kenshi, Dr Nzahabwanimana yasabye ko mu gihe cya vuba abaturage batuye mu Gisakura bashobora kugerwaho n’impanuka bimurwa, ndetse hagashyirwaho ibyapa biburira abatwaye ibinyabiziga, bagashyiraho kandi n’ibyuma bitangira imodoka mu gihe hagishakwa ikindi gisubizo kirambye.

Agira ati “Twafashe ibyemezo twibwira ko bizadufasha guca impanuka muri aka gace, turongera ibyapa biburira ndetse tuzashyiraho vuba ibyuma bitangira imodoka, kandi turashaka ko abaturage bari ahantu hashobora kugerwaho n’impanuka bakwimurwa vuba”.

Nibura mu mezi abiri ashize mu ishyamba rya Nyungwe ndetse no mu nkengero zaryo hamaze kuba impanuka zirenga 10, zimaze gukomeretsa abantu benshi ndetse zikanahitana abantu.

Umugwaneza Jean Claude