Ubuyobozi bwa polisi mu karere ka Bugesera butangaza ko iyi modoka yafatiwe mu Kagari ka Kanzenze, Umurenge wa Ntarama, mu Karere ka Bugesera mu masaha ya ninjoro yo kuwa 9/11/2014 yerekeza mu Mujyi wa Kigali.

Ngo abari muri iyi modoka bahise batoroka bariruka n’ubu bakaba bagishakwishwa ngo hamenyekane irengero ryabo.

IP Kayigi Emmanuel, umuvugizi wa Polisi w’agateganyo mu Ntara y’Iburasirazuba, aranenga abantu bitwikira ijoro bakangiza ibidukikije batema ibiti by’umushikiri bibwira ko bagiye kubikuramo amafaranga.

Agira ati “Polisi y’igihugu irihanangiriza bikomeye abantu batema ibiti by’umushikiri kuko ari icyaha cyo kwangiza ibidukikije gihanwa n’amategeko y’u Rwanda, nta na rimwe polisi izihanganira bene aba bagizi ba nabi”.

Akomeza agira ati “Twese dusobanukiwe neza ko ibiti bidufasha kubona umwuka mwiza duhumeka n’akandi kamaro bitugirira. Iyo byangijwe bituma tugerwaho n’ingaruka mbi nyinshi.”

IP Kayigi asaba buri munyarwanda gufatanya n’inzego z’umutekano mu kurwanya abantu abo aribo bose bari muri bene ubu bucuruzi, binyuze mu guhanahana amakuru ku gihe kugira ngo abakekwaho ibi byaha batabwe muri yombi maze babihanirwe.

Ibiti by’umushikiri bikunze kuba mu karere ka Bugesera kuko biba ahantu hashyuha.

Egide Kayiranga