Aya ni amagambo umukuru w’igihugu yabwiye abatuye mu karere ka Musanze, mu muhango wo Kwita Izina ku nshuro ya 11 abana b’ingagi 24, wabereye mu murenge wa Kinigi, kuwa 05/Nzeri/2015.

Pereida Kagame yababwiye ko atakwirirwa abasobanurira ijambo ubucyene icyo ari cyo kuko babuzi neza nk’abantu baburimo anabasobanurira ko ingufu avuga zigomba gukoreshwa ari imbaraga n’ubushake bya buri Munyarwanda wese.

Perezida aha Abanyamusanze n’Abanyarwanda bose impanuro ku munsi wo kwita izina

Agira ati “ku ngufu icyo mvuga, ni imbaraga n’ubushake tugomba gukoresha kugira ngo tuve mu bucyene. Ubishaka azaze abutware ntabwo dushaka. Turahera rero ku mutungo dufite wo gushyigikira ibijyanye n’ubukerarugendo, ari muri parike y’ibirunga ari n’izindi parike ndetse n’ibindi byose bishobora gukurura abasura igihugu cyacu batuzanira ibivamo bwa bukungu twifuza.”

Umukuru w’igihugu yanabwiye abanyamusanze n’Abanyarwanda muri rusange ko iby’ibanze kugira ngo bave mu bukene bimaze kugerwaho.

Perezida asuhuzanya n’umuyobozi w’intara y’Amajyaruguru

Ati “icyo nagira ngo mbabwire banyamusanze kandi mbwira n’abandi mu gihugu hose, iby’ibanze byangombwa kugirango tuve muri buriya bukene bimaze kugerwaho. Icyambere ni imyumvire, icya kabiri ni umutekano, icya gatatu ni ubushake, icya kane ni ugukora kandi banyamusanze murazwi ko muri abakozi”

Abaturiye parike y’ibirunga basanga kuba baturanye na yo barasezeye ubukene kuko umusaruro w’ubukerarugendo bawubonaho, bakanagira amahirwe yo kubona imvura kurusha ahandi ituma babona umusaruro.

Perezida asuhuza abanyamusanze n’abandi bari bitabiriye ibirori; bamwakiranye ubwuzu n’ibyishimo byinshi

Ndungutse Francois wo murenge wa Kinigi, akaba aturiye iyi parike ati “ubukene bwambere twavuyemo navuga, ni uko dufite amahirwe kuba twarabonye parike y’ibirunga kuko umusaruro w’ubukerarugendo tuwubonaho. Duhinga ibirayi hano mu Kinigi kandi dufite n’amahirwe yo kubona imvura iva kuri parike yacu, nkumva rero twebwe ubukene twarabusezeye kuko dufite umutungo kamere.”

Abdul Tarib