Yaboneyeho ababwira ko igihe hatabayeho gutanga serivisi nziza bidindiza iterambere ry’igihugu kuko ngo abahabwa serivisi mbi bibababaza bigatuma badakora imirimo yabo bashishikaye uko bikwiye.

Kangwagye yanababwiye ko nta na rimwe Umukuru w’Igihugu, Paul Kagame, azihanganira ko abashinzwe gutanga serivisi batanga serivisi mbi.

Yagize ati”Nta na rimwe umukuru w’igihugu cyacu Nyakubahwa Paul Kagame azihanganira abayobozi batanga serivise mbi ,ku bo bashinzwe kuyobora.”

Kangwagye akaba yongeye kwibutsa abaturage ko guhabwa serivise nziza ari uburenganzira bwabo kandi ko nta n’ikiguzi bisaba.

Yagize ati”Guhabwa serivise nziza ni uburenganzira bwa buri wese.Ikindi nta muturage ukwiye kugura serivise ahabwa ,kuko kugura serivise ugomba guhabwa ,ni ikosa kuri wowe no k’uwo uhaye icyo kiguzi.Uwo bizagaragara ko agurisha serivise agomba gutanga, azabihanirwa n’amategeko.”

Kangwagye yakomeje yibutsa abaturage ko mu gihe bahawe serivise itabanyuze bafite uburenganzira bwo kujya mu zindi nzego zisumbuye, bityo bagahabwa ibyo bakeneye, mu rwego rwo gufatanyiriza hamwe kwiyubakira igihugu mu kunoza serivise.

Nyuma y’ibibazo byinshi yabajijwe n’abaturage bo mu Mirenge ya Tumba na Base, Umuyobozi w’Akarere ka Rulindo yabijeje ubufasha igihe cyose bamukeneye kandi ko azabana na bo cyane mu rwego rwo gufatanyiriza hamwe gukemura ibibazo byananiranye mu nzego z’ibanze.

Hortense Munyantore