Yagize ati “ibyo umugore wo mu cyaro akora nibyo bituma umugore wo mu mujyi cyangwa undi wese utuye mu mujyi amererwa neza, ubona umuntu ngo avuye i Kigali iyo umuntu avuye Mushikiri akajya i Kigali ngo ubona asa neza, aza yarakarabye yarisize bamubona ngo uriya avuye ku matara ariko ibyo byose abiterwa n’uwo yasize mu cyaro umugemurira bya bitoki, bitabaye ntiyasa neza”.

Depite Mujawamariya agira inama abantu ko umugore adakwiye gufatwa nk’ingorofani, agomba gufatanya n’umugabo kugira ngo abone umwanya wo gukaraba agacya akabona uko anogera umugabo we bityo iterambere mu ngo rikarushaho kwiyongera.

Ibyo birori byabereye mu Kagari ka Nyarusange mu murenge wa Mushikiri tariki 25/10/2014 bibimburirwa n’igikorwa cy’umuganda aho abaturage biyubakiye ikiraro kihuza akarere ka kirehe n’akarere ka Ngoma.

Bamwe mu bagore baganiye na Kigali Today bavuze ko babona impinduka nini bagereranyije n’uko umugore wo mu cyaro wo hambere yabagaho.

Musabyimana Juditte aragira ati “kera nta bwigenge twagiraga mbese twari hasi cyane none ubu twahawe agaciro ni byiza cyane, kera barakubitwaga cyane inkoni ikaba ari byo biryo byabo, none ubu turubahana tukajya inama n’abagabo tukagera kuri byinshi.”

Mukamwiza Frorence nawe aremeza ko umugore yahawe agaciro ngo si nka kera.Yagize ati“ ubundi kera barahingaga bakweza umugabo agafata imyaka akagurisha nta nama agishije umugore naho ubu byose babijyaho inama, rwose abagore bo mu cyaro uko tubayeho biratunyuze.”

Abo bagore baragira inama abagore bose bo mu cyaro gukora bagatinyuka ntibatege byose ku bagabo, bagakora bagakura amaboko mu mifuka bateza ingo zabo imbere.

Umuyobozi w’akarere ka Kirehe w’agateganyo yavuze ko umugore wo mu cyaro agira akazi kenshi ariko ibikorwa akora ntibigaragarire bose bakabifata nk’ibyoroheje kandi avunika cyane. Arasaba abagabo kujijuka bakumva ko kuvunisha umugore ari ukunyuranya n’iterambere igihugu gishaka kugeraho.

Muri ibyo birori hahembwe abagore bo mu cyaro bagiye bakora ibikorwa by’indashyikirwa. Ishyirahamwe ry’abagore baboha uduseke n’ibikoresho binyuranye birimo isabune n’amavuta batuye mu kagari ka Nyabitare umurenge wa Mushikiri nibo bahawe igihembo cya mbere kingana na sheki y’amafaranga ibihumbi magana abiri.

Umunsi mpuzamahanga wahariwe umugore wo mu cyaro wizihizwa kuri 15 Ukwakira. Uyu munsi wemejwe mu nama mpuzamahanga yabereye Beijing mu Bushinwa mu mwaka wa 1995 ariko mu Rwanda watangiye kwizihizwa mu mwaka wa 1997.

Insanganyamatsiko y’uyu mwaka “Dushyigikirane mu nzira yo kwigira” yatoranyijwe hakurikijwe inzitizi abagore bo mu cyaro bahura nazo mu kwiteza imbere; nk’uko byasobanuwe na Kakuze Liberatha uhagarariye inama y’igihugu y’abagore.

Nkuko insanganyamatsiko y’uyu mwaka ivuga habayeho n’igikorwa cy’abaturage cyo kuremera bagenzi babo hatangwa inka eshanu, matora icumi n’ibitenge makumyabiri.

Servilien Mutuyimana