Amwe muri ayo mazu yatobaguritse amabati ayasakaye ni ayubatswe mu mwaka w’1998 ndetse n’1999. Abayatuyemo bavuga ko bubakiwe amazu ariko ntibubakirwe imisarani n’ibikoni bigatuma bayacanamo maze amabati atora umugese.

Hamwe muho twabashije kugera mu murenge wa Ngororero mu kagali ka Rususa mu mudugudu wa Rususa, abo baturage twasanze barimo gushakisha aho babitsa utuntu twabo twakwangizwa n’amazi kuko imvura yari ikubye.

Iyo urebeye imbere muri ayo mazu usanganirwa n’imyenge myinshi iri mu mabati aho imwe minini yatewe no gusaza kw’amabati naho indi myinshi mitoya ikaba yaratewe n’imvura y’amahindu iherutse kugwa muri ako gace.

Umunyamabanga nshingwabikorwa w’umurenge wa Ngororero, Habiyakare Etienne, yadutangarije ko nabo ikibazo bakizi bakaba barasabye umuryango utabara imbabare Croix-Rouge wabafasha kubona aho barara batanyagirwa mu gihe ikibazo cyagejejwe muri minisiteri ibishinzwe.

Ikibazo cy’ayo mazu umuntu yavuga ko adasakaye kigaragaye mu gihe akarere kari muri gahunda yo kwegurira ayo mazu abayatuyemo nkuko byasabwe na minisiteri y’ubutegetsi bw’igihugu, bamwe bakaba bafite impungenge z’uko bazayahabwa ameze atyo.

Mu gihe mu Rwanda turi mu cyumweru cyahariwe ubumwe n’ubwiyunge, abagize Forumu y’ubumwe n’ubwiyunge muri ako karere ndetse n’abarokotse Jenoside ubwabo bemeza ko kutagira aho baba ari imwe mu nzitizi z’ubumwe n’ubwiyunge.

Ernest Kalinganire