Umwe muri abo banyeshuli witwa Umutoniwase Yvette yari aryanye mu nzu bararamo (dortoire) atagiye mu ishuli kubera ikibazo cy’uburwayi yari afite maze umuyobozi w’iryo shuli Munyengango Jean Pierre aramukubita.

Umutoniwase avuga ko umuyobozi w’ikigo yamukubise kandi yari azi ko arwaye kuko ari nawe wari wamuhaye amafaranga yajyanye kwivuza amenyo ku bitaro bya Muhororo tariki 04/05/2012.

Ubwo Kigalitoday yamusangaga aho arwariye, Umutoniwase yatangaje ko nyuma yo kubwira umuyobozi w’ikigo ko atari bubashe kwiga kubera ikibazo cy’uburwayi yari afite, uwo muyobozi yamusabye gusohoka ku ngufu amubwira ko ateriwe wenyine urwaye ko agomba kujya mu ishuli nk’abandi, niko kumukubita inkoni ebyiri.

Umutoniwase yaratatse maze bagenzi be nabo bari muri iyo nzu bavuza induru bigera no kubari bamaze kugera mu mashuli maze 21 muri bo bahita bagira ikibazo cy’ihungabana.

Umuyobozi w’iryo shuli avuga ko yakubise inkoni Umutoniwase mu rwego rwo kumucishaho akanyafu kuko ngo ubwo batumvikanaga ku gusohoka ngo ajye mu ishuli uyu mukobwa yamubwiye amagambo atari meza; gusa yemeza ko yari agamije guhana nta kindi kibyihishe inyuma.

Ibi abihurizaho n’umunyamabanga nshingwabikorwa w’uyu murenge wa Kageyo, Mundanikure Joseph uvuga ko nyuma y’iperereza inzego zitandukanye zakoze kuri iki kibazo basanze harabayeho guhana uyu mukobwa maze bihura n’uko afite ikibazo cy’uburwayi bifata iyo ntera.

Nubwo ubuyobozi bw’ishuli ndetse n’ubw’umurenge wa Kageyo buvuga ko iki kibazo kirimo gukemuka, tariki 08/05/2012, abandi banyeshuli babiri bari bagumishijwe ku ishuli nabo bazanywe mu bitaro bya Muhororo naho barindwi ntibarabasha kujya mu ishuli nk’uko ubuyobozi bw’ishuli bubitangaza.

Impamvu nyakuri yateye iri hungabana iracyakurikiranwa n’inzego zibishinzwe kandi Kigalitoday izakomeza kubakurikiranira iyi nkuru.

Ernest Kalinganire