Uru ruzinduko rwakusanijwemo amafaranga arenga ibihumbi 900 rugamije kurushaho kunoza umubano uri hagati y’abasilamu b’akarere twabo banagaragaza uruhare rwabo mu iterambere rya Islam.

Ibiganiro byavugiwe muri uru ruzinduko byari byiganjemo inyigisho ziganisha ku bumwe n’ubwiyunge, ibiganiro biganisha ku mahoro, n’imibanire y’umusilamu n’undi utari umusilamu.

Imamu w’umusigiti wa Gituku, Nzirorera Yasini Yusufu, yatangaje ko bashimishijwe n’ababashyitsi babagendereye dore ko babafashije mu gikorwa cyo gukusanya inkunga yo kubaka uyu musigiti uzaba umusigiti ntangarugero mu karere ka Ngoma.

Imamu w’intara y’iburasirazuba, Kamanzi Jumaine, yasabye abayisilamu kudacikamo udutsiko ahubwo bagasenyera umugozi bajyana n’iterambere ry’igihugu. Yongeyeho ko kubijyanye n’inyubako y’umusigiti wa Gituku nawe akomeje gukora ubuvugizi kandi abaterankunga bakaba ngo baremeye kubafasha kuyizamura.

Yabisobanuye agira ati “Muramenye ntimuzacikemo udutsiko kuko niducikamo udutsiko tuzahora turi inyuma y’abandi mu gihe abandi bazaba bari gutekereza uko batera imbere.”

Muri uyu muhango wabaye tariki 24/06/2013 hari n’abantu bo mu yandi madini bahise binjira mu idini ya Islam kubera kunyurwa n’inyigisho bahakuye.

Jean Claude Gakwaya