Hari mu biganiro ku kurwanya Jenoside no kuri gahunda ya “Ndi Umunyarwanda” aho abanyeshuli nabo bifuje ko ibiganiro nk’ibi byatangirira mu bana bakiri bato.

Nk’uko byagarutsweho na Bregadier General Frank Rusagara, ngo mbere y’umwaduko w’abazungu Abanyarwanda bari babanye neza kandi bishimiye inyito bari bafite dore ko yari ishingiye ku mwuga w’umuryango.

Gusa ngo abazungu bajya kubyita amoko, bagira ngo bacemo Abanyarwanda ibice bityo babashe kubayobora ariko bo ntibamenya ko babibwemo imbuto y’urwango.

Aha rero akaba yasabye urubyiruko ruri mu mashuli guhindura aya mateka bakarekeraho kwirebera mu ndorerwamo z’amoko kuko nta nyungu bibazanira, ahubwo bakareba ikibahuza dore ko ngo n’abahuje ntakibananira.

Iyi mbuto y’urwango ngo ni nayo abayobozi baje gutoza Abanyarwanda ingaruka yayo iba Jenoside yakorewe Abatutsi muri Mata 1994. Aha rero niho uwari uhagariye komisiyo y’igihugu yo kurwanya Jenoside yahereye asaba abanyeshuli kurwanya icyakongera gusubiza Abanyarwanda mu icuraburindi ahanini bamagana abapfobya Jenoside.

Bugingo Albert, umwe mu banyeshuli bahawe ibi biganiro avuga ko yamenye ukuri kandi azakugeza no ku bandi akanashimangira ko utazi aho ava atamenya naho agana. Aha rero agasaba urubyiruko kwigira ku mateka bakubaka icyerekezo kizima kiganisha igihugu ku iterambere.

Gusa ariko nanone ngo ibiganiro nk’ibi bikwiye guhera mu bana bato bakiga mu mashuli abanza dore ko ngo ari bwo byatanga umusaruro.

Kugira ngo iyi gahunda ya “Ndi Umunyarwanda” buri wese ayiyumvemo, ngo bisaba gushyira ukuri ahagaragara. Naho mu mashuli ho hifujwe ko hajyaho amatsinda agamije gukangurira abandi banyeshuli ndetse akamanuka no mu midigudu aho abaturage batuye.

Ibiganiro nk’ibi kandi byatanzwe no mu ishuli rikuru ry’ubuforomo n’ububyaza rya Nyagatare, aho abanyeshuli bifuje ko amateka y’amoko n’intandaro ya Jenoside yakorewe Abatutsi byakwandikwa kugira ngo bitazibagirana. Bakaba ariko nanone bizeje ko ibyo bungukiye muri ibi biganiro bazabigeza kuri benshi bahereye ku miryango bakomokamo.

Dan Ngabonziza