Itegeko riteganya ko iyo umuyobozi w’akarere yeguye asimburwa n’umwungirije ushinzwe ubukungu akayobora by’agateganyo akarere mu gihe kitarenze amezi atatu.

Nambaje yahataniraga umwanya w’umuyobozi w’akarere ka Ngoma n’abandi babiri aribo Bizumuremyi Steven na Murekatete Judith. Nambaje Aphrodis yawegukanye n’amajwi 153 ku bajyanama 236 batoye.

Bizumuremyi Steven yabonye amajwi 32 kuri 236 batoye naho Murekatete Judith abona amajwi 51 ku bantu 236 batoye. Muri aya matora habonetse imfabusa imwe.

Nyuma yo gutorwa, umuyobozi mushya w’akarere ka Ngoma yatangaje ko yishimye kandi ko ashima Imana, abamutoye ndetse na Nyakubahwa Perezida wa Republika y’u Rwanda.

Mubyo yavuze agiye gushyira imbere mu buyobozi bwe harimo serivise zihuse, kwigisha abaturage amategeko abarengera no guha ingufu inzego zo mu midugudu. Yavuze kandi ko Ngom aifite umutungo udasanzwe w’ubutaka bwiza n’ibindi bikaba bigomba kubyazwa umusaruro.

Nambaje Aphrodis yize amashuri makuru muri kaminuza nkuru y’ u Rwanda i Butare mu ishami ry’indimi n’ ubuvanganzo nyafrika. Mu byo yakoze, yabaye umurezi mu mashuri yisumbuye atandukanye mu gihe cy’imyaka 14, yakoreye radiyo Izuba ivugira mu Ntara y’Uburasirazuba, mbere yuko atorwa yakoreraga umushinga ARAMA wo kurwanya ihohoterwa rikorerwa abagore aho yakoraga nk’umukozi ushinzwe itumanaho.

Jean Claude Gakwaya