Umugaba Mukuru w’Ingabo zirwanira ku Butaka, Maj. Gen. Frank Mushyo Kamanzi yabitangaje mu muhango wo gufungura amahugurwa y’ibyumweru bibiri yitabiriwe n’abasirikare, abapolisi n’abasivili 25 bava mu bihugu bitandatu by’Afurika y’Iburasizuba, ku wa Mbere tariki 11 Gicurasi 2015.

Avuga ko mu myaka yo hambere, ibikorwa byo kubungabunga amahoro byakorwa cyane cyane n’abasirikare ariko iyo myumvire ngo yarahindutse kuko n’abasivili bagiramo uruhare mu buryo bunyuranye kurusha mbere.

Abasivili ngo ni bo baba bashinzwe imirimo ijyanye n’uburenganzira bwa muntu, kurwanya ihohoterwa rishingiye ku gitsina, gutanga ubufasha mu buryo bunyuranye, gukemura ibibazo by’impunzi, ibibazo bya politiki n’ibindi.

Col. Jill Rutaremara uyobora Ishuri Rikuru ry’Amahoro (Rwanda Peace Academy) ryakiriye ayo mahugurwa, aganira n’itangazamakuru, yavuze ko hari ibibazo bishya byagiye bivuka mu butumwa bw’amahoro bikemurwa n’abasivili akaba ari yo mpamvu ubwo bufatanye ari ngombwa.

Abasirikare, abapolisi n’abasivili bitabiriye aya mahugurwa bibukijwe ko umutekano urenze urusaku rw’amasasu kuko abaturage iyo bugarijwe n’inzara baba badatekanye.

Col. Rutaremara agira ati “Abaturage ntabwo baba bafite umutekano igihe bafite inzara, mu gihe hari ibyo bibazo, akaba ari yo mpamvu ingabo z’u Rwanda zijya muri ibyo bikorwa: kubaka amashuri; kubaka ibiraro, kuvura abaturage n’ibindi bikorwa kandi ibyo babikora mu Rwanda no hanze. Ibyo bituma ingabo bazigira icyizere bumva zinabitayeho”.

Umugaba Mukuru w’Ingabo zirwanira ku Butaka, Maj. Gen. Mushyo Kamanzi ashimangira ko kunoza imikoranire n’ubufatanye bihera mu guhugurirwa hamwe.

Ati “Ubwumvikane buke hagati y’ingabo n’abasivili bikwiye kwirindwa kuko inshingano z’abasirikare n’iz’abasivili ziruzuzanya. Ibyo bakora bituma ubutumwa bugenda neza. Imikoranire hagati y’ingabo n’abasivili bigomba kunozwa mu mahugurwa nk’aya”.

Aya mahugurwa yateguwe ku bufatanye n’Ishuri Rikuru ry’Amahoro n’Ubwongereza bubinyijije mu Kigo cy’Ubwongereza gishinzwe guhugura abitabazwa mu butumwa bw’Amahoro (British Peace support Team).

Ambasaderi w’u Bwongereza mu Rwanda, William Gelling, witabiriye uyu muhango, yatangaje ko igihugu cye gishyize imbere ubufatanye bw’ingabo n’abasivili mu bikorwa byo kugarura amahoro.

Ati “Ubwongereza bufite ubushake bwo gutegura amahugurwa ahuza abasirikare n’abasivili kuko ubufatanye bw’abasirikare n’abasivili ni cyo cyerekerezo cy’ejo hazaza cy’imikorere yagombye kuranga ibikorwa byo kugarura amahoro.

Abasirikare, abapolisi n’abasivili 25 bakomoka mu bihugu by’Afurika y’Iburasizuba ari byo u Rwanda, u Burundi, Uganda, Kenya, Sudan n’ibirwa bya Comoros ni bo bitabiriye aya mahugurwa azamara ibyumweru bibiri.

NSHIMIYIMANA Léonard