Ubwo hasozwaga icyiciro cya mbere cy’ukwezi kwahariwe imiyoborere mu Murenge wa Kimonyi mu Karere ka Musanze ku wa Kane tariki 02 Mata 2015, abaturage bagejeje ku buyobozi bw’akarere ibibazo bitandukanye bafite ariko ibijyanye no kubona ibyangombwa bw’ubutaka bya burundu n’icy’ubuharike ni byo biza ku isonga.

By’umwihariko abagore bagaragarije ubuyobozi akarengane barimo gukorerwa n’abagabo babashakiyeho abandi bagore, bakaba bafite ikibazo cyo gutunga abana kuko badafite uburenganzira ku mutungo no kubona amafaranga yo gutanga igarama mu rukiko bikaba ari ikibazo.

Mukabucyana Penina utuye mu Murenge wa Kimonyi arapfutse ku kaguru. N’amarira menshi yabwiye Kigali Today ko amaze gutemwa n’umugabo we wamuharitse mu myaka itanu ishize, agashaka kumwirukana iwe na ho ngo ahatware.

Umuyobozi w’Akarere ka Musanze, Mpembyemungu Winnifride ashimangira ko ubuharike ari kimwe mu bikurura umutekano muke kuko abagore baharitswe batumvikana, agakangurira abagore baguye muri icyo kibazo kwirinda umwiryane bakemera gusangira umugabo umwe mu mahoro.

Agira ati “Ikibazo cy’ubuharike gikomeje gukurura amakimbirane mu ngo, inama twatanga abagezweho n’ubuharike bemeye gusangira umugabo umwe, nibemere bamusangire mu rukundo ariko abakobwa…turabakangurira kwirinda kujya guharika bagenzi babo…”.

Ubuharike bukurura kandi amakimbirane ashingiye ku mitungo, bityo abagabo bafite abagore benshi bagirwa inama yo kugabanya iyo mitungo abana babo hakiri kare mu rwego rwo kwirinda icyo kibazo gikunda kuvuka.

Ngo hari abagore baharikwa bitewe n’imyitwarire yabo itari myiza nk’ubusinzi. Umuyobozi w’akarere yihanije ababyeyi bafite iyo ngeso guca ukubiri nayo kuko ibatesha agaciro, ariko ngo ushaka kunywa inzoga yayinywera iwe mu rugo.

Kuva tariki 18 Werurw ukwezi kw’imiyoborere myiza kwatangira, ubuyobozi bw’akarere bwakiriye ibibazo by’abaturage 89, muri byo 82 birakemurwa ibindi ngo biri mu nzira zo kubonerwa igisubizo.

NSHIMIYIMANA Leonard