Iyi ruhurura ituruka munsi ya Gereza ya Kigali (1930), imanukira iruhande rw’agahanda kangiritse kanyura hagati y’inzu z’ubucuruzi zishaje cyane, ikagera i Nyabugogo. Haba kandi ikimeze nk’isoko (marato) ryiganjemo imboga n’imbuto.

Kubera ukuntu iyi ruhurura idatwikiriye, abaturage bagiye birwanaho bagakora ibimeze nk’intindo z’imbaho ari na zo baba bicayeho bacuruza kandi munsi yazo huzuye imyanda.

Mukeshimana Jeanne, yaje guhaha, avuga ko atakwirirwa ajya kure kandi ibyo akeneye abireba hafi ye nubwo hamutera ipfunwe.

Agira ati "Ntuye hano hafi y’iyi ruhurura, mpahira hano buri gihe ariko ni uko nta bushobozi naho ubundi umuntu yahimuka kuko umunuko w’aha uterwa n’umwanda utumereye nabi".

Yongeraho ko kubera ukuntu hatuwe cyane, hahora uruvunganzoka rw’abantu cyane mu masaha y’umugoroba, na byo bikaba ibyongera umwanda nubwo bagerageza gukora isuku.

Mushimiyimana Vedaste, umwogoshi ukorera akazi ke mu nzu yegereye iriya ruhurura, we avuga ko aherutse kurwara azira resitora ariramo na yo iri hafi y’aho akorera.

Mushimiyimana ati "Narwaye mu nda biba ngombwa ko nivuza, ngatekereza ko byavuye ku mwanda wo muri resitora ndiramo kuko uba ubona hari isazi zituruka muri ruhurura inyura ku muryango wayo".

Akomeza avuga ko mu nama n’ubuyobozi badasiba gusaba ko iriya ruhurura yatunganywa ariko ngo ikorwa ryayo riri kure kuko bababwira ko rizajyana n’umuhanda.

Umunyamabanga Nshingwabikorwa w’agateganyo w’Umurenge wa Muhima, Rugema Christine, avuga ko ikibazo cy’iriya ruhurura kigoye.

Agira ati "Twebwe nk’umurenge ntacyo twagikoraho kuko kirenze ubushobozi bwacu. Gukora iriya ruhurura bizagendana n’igishushanyo mbonera cy’Umujyi wa Kigali cyane ko hariya hazubakwa inzu z’ubucuruzi".

Rugema akomeza avuga ko icyo bakora ari ugushishikariza abahatuye kuhagirira isuku, buri umwe akaba ijisho rya mugenzi we kugira ngo bahashye abamena imyanda muri iriya ruhurura.

Munyantore Jean Claude