Umuyobozi w’Akarere ka Muhanga avuga ko abaturage bashaka ibitabagenewe batanga ruswa ku bayobozi kugira ngo babibone, icyo yita gushaka kwigwizaho ubukire nk’ubw’amasiha.

Imico nk’iyo ngo usibye guteza igihombo ku bagombaga guhabwa serivisi runaka ngo inateza umwaku ku bashaka kwikubira iby’abandi nk’amasiha cyangwa imbeba bisahura ibikoresho bitabifitiye akamaro.

Mutakwasuku agira ati “hari abafite umuco nk’uw’amasiha akurura byose atanabanje kureba ibifite akamaro, nka buriya isiha itwara urukweto ngo izarwambare? Natwe rero hari abigize nka yo, ariko hari igihe usakuma n’ibizakwica ahubwo”.

Mayor Mutakwasuku avuga ko guharanira gutanga serivisi nziza bitava mu bayobozi gusa ahubwo ko n’uruhare rw’abaturage rukenewe.

Ahereye kuri gahunda zigamije kugoboka abakene zivugwamo amanyanga hagati y’abaturage n’abayobozi, umuyobozi w’Akarere anenga buri wese wigwizaho ibyari bigenewe abakene.

Zimwe muri gahunda Mutakwasuku abonamo ubufatanyacyaha hagati y’abaturage n’abayobozi kandi babikoreye ubushake ni nk’iya girinka munyarwanda aho usanga inka zihabwa abatazigenewe kandi abakene bahari bakanyagwa n’abaturanyi babo.

Indi gahunda igaragaramo amanyanga ngo ni iy’abatishoboye bahabwa inkunga y’ingoboka bageze mu za bukuru ugasanga abaturage ubwabo bararenganya bamwe mu bayikeneye bagatanga ruswa bagashyirwa mu mwanya w’abatishoboye.

Umuyobozi w’Akarere ka Muhanga aboneraho gusaba abaturage kuba maso bakamenya ko ubashora mu gusahura iby’abandi nta mugisha atezemo usibye guhomba n’ibyo yari asanganwe.

Gusakuma iby’abandi kandi ngo byorora umuco wa ruswa kuko usanga abashaka indonke bemera no gushora batitaye ku byo bahomba igihe bafashwe, urugero uyu muyobozi atanga akaba ari abayobozi barimo gutabwa muri yombi kubera kurya amafaranga ya VUP cyangwa kunyereza umutungo w’abaturage bashinzwe kureberera.

Ephrem Murindabigwi