Bamwe mu bakozi b’inzego z’ibanze bavuga ko kubera akazi kenshi bakora kugira ngo batange umusaruro, usanga bigereranya n’icyuma cy’imyanya myinshi cyifashishwa mu gutanga amashanyarazi (Multiprises).

Mutakwasuku agira inama abakozi kujya bakora akazi ariko nabo bakiyibuka.

Umunyamabanga nshingwabikorwa w’Umurenge wa Mushishiro Uwamaliya Beatrice, avuga ko abakozi b’inzego z’ibanze badashyize gahunda mu kazi kabo wasanga batagangaye.

Agira ati “Iyo twirebye inzego z’ibanze turi militipurize, inzego zo hejuru ni twe zivoma mo tutitondeye akajagari twagira ikibazo, tugomba gushyira ingufu muri gahunda duteganya gukora kugirango tubashe kunoza akazi.”

Uwamaliya (hagati) avuga ko kubera akazi mu nzego z’ibanze bakora nka muritipurize.

Umuyobozi w’Akarere ka Muhanga Yvonne Mutakwasuku, avuga ko abakozi bagomba gutekereza ku nshingano zabo kuko iyo bagize akajagari mu kazi bibatera gukora nabi, ahubwo ugasanga umuntu arigereranya na muritipurize kandi nyamara biterwa n’uko umuntu aba atateguye neza gahunda ze.

Kuba abakozi bakora cyane ngo si ukosa ahubwo bisaba gutegura neza uko bitwara muri ako kazi, kuko umukozi atanga umusaruro iyo yakoze neza kandi mu gihe kigenwe ku rugero, Mutakwasuku agira

Ati “Nimwigira muritipurize buri wese agacomeka mwe muzasigara muri iki? Ubwo twaba turi ibihazi kuko dukora tutariho, kandi umurimo ukorwa n’umuntu muzima mu bwenge na Roho!”
Mutakwasuku asaba abakozi bose guhsyira gahunda mu kazi kuko ari bwo kaguhesha agaciro no gutanga umusaruro kuri weho n’umukoresha.

Ephrem Murindabigwi