Ikibazo kibagora cyane ngo nuko igihe cyo gutanga ibiribwa n’imiti iyo kigeze, usanga hari abatabona ibyo bagakwiye kubona kubera ko hari ababa bafite abana batabaruwe kandi ibintu bitangwa hakurikijwe umubare w’abantu bari mu muryango.

Umuyobozi w’inkambi ya Kiziba, Niyibizi Habimana, avuga ko icyo kibazo kibabangamiye cyane kubera ko n’ubusanzwe ubuzima bwo mu nkambi nabwo butaboroheye.

Kuri icyo kibazo, umuyobozi w’akarere ka Karongi, Kayumba Bernard, yizeza impunzi ko ubuyobozi bw’umurenge wa Rwankuba iyo nkambi ibarizwamo bwaborohereje bukabegera kugira ngo bandikishe abana.

Ngo ababyeyi bafite ibibazo by’abana batarabarurwa ibyinshi usanga ari ibimaze igihe, ariko nabyo ngo biri mu nkiko kandi Kayumba yabijeje ko nabyo bizakemuka.

Inkambi ya Kiziba icumbikiye impunzi z’abanye Congo 16.632, bageze mu Rwanda bahunze ubwicanyi bwabakorerwaga na Leta ya Kabila kuva mu 1996.

Marcellin Gasana