Hari mu kiganiro yatanze kuri uyu wa kabiri tariki 20 Ukwakira 2015, muri iyo nama, kivuga ku ikoranabuhanga kuri bose, mu rwego rwo guteza imbere abagore.

Yagize ati ”Ibyo dutekereza byose abagore na bo barabishoboye, kuko niba barashoboye guteza imbere ikoranabuhanga rikenerwa mu buzima bwa buri munsi[hano mu Rwanda], kuki tubona ko bigoye umugore kwiga ibijyanye na siyansi!”.

Yashimye Abanyarwandakazi bashoboye gukora imbuga za internet no kuvumbura programu zikoreshwa muri mudasobwa na terefone, hagamijwe gufasha abantu kumenya amakuru yabakura mu bushomeri ndetse no koroshya imirimo.

Bamwe mu bo yarondoye hari Lilian Uwintwari washyizeho ikoranabuhanga rifasha abagore kubona igishoro, Chance Tubane washyizeho urubuga rufasha abantu kobona imirimo n’amacumbi, ndetse na Clarisse Iribagiza washyizeho programu igeza ubutumwa ku bantu barenga 5000 icyarimwe.

Mme Jeannette Kagame yavuze ko guteza imbere umugore biri muri gahunda y’intego z’iterambere rirambye(SDGs) kandi bikaba ngo ari ngombwa cyane, kuko abagore muri siyansi n’ikorabuhanga ngo bakiri bake.

Yasabye ubufatanye bw’inzego, imiyoborere myiza, ishyirwaho ry’amategeko ateza imbere ibyiciro byose birimo abagore, inzego zishoboye ndetse n’ubukangurambaga ku baturage.

Ku ruhande rw’u Rwanda, ibi ngo byatekerejwe kare bitewe n’ubuyobozi bw’Igihugu bufite icyerekezo, aho amategeko ateza imbere uburinganire yagiyeho, bituma 30% by’imyanya mu nzego zifata ibyemezo ari iy’abagore.

Mme Jeannette Kagame ati ”Ubu abagore barareshya n’abagabo, bose babona umurage ungana mu muryango, gahunda iteza imbere uburezi kuri bose ntiyasize abana b’abakobwa inyuma, aho kuri ubu abakobwa 98% bari mu ishuri, abenshi muri bo bakaba biga ibijyanye n’ikoranabuhanga”.

Ngo nta muntu wabasha guteza imbere igihugu cyangwa umuryango w’abantu runaka, yirengagije igice kirimo umubare munini wabo, akaba ari byo Ministiri w’Urubyiruko n’Ikoranabuhanga, Jean Philbert Nsengimana yashimiye Mme Jeannette Kagame muri Transform Africa.

Mme Jeannette Kagame abinyujije mu muryango wa Imbuto Foundation, yateje imbere uburezi bw’umwana w’umukobwa ku buryo abagera ku bihumbi bine bahawe ibihembo birimo mudasobwa, kandi bajya kwiga siyansi n’ikoranabuhanga.

Simon Kamuzinzi