Bamwe mu bafungiye muri iyi gereza bavuga ko bishimiye iyi gahunda Leta y’u Rwanda yafashe yo kwigisha Abanyarwanda bose ko ari bamwe bityo bakazubaka u Rwanda rushingiye ku bumwe rutarimo Hutu, Tutsina Twa; nk’uko Nzigererayo Emmanuel umunyururu ufungiye icyaha cya Jenoside abitangaza.

Nzigererayo Emmanuel kandi avuga ko ubuyobozi bubi bwariho igihe cya Jenoside aribwo bwabashishikarizaga kwica Abatutsi ndetse bakabatoza urwango mu mitima kuko bumvaga ko Umututsi atari umuturarwanda ari umwimukira bityo bakurana urwango kuko mubuhamya bwe yavuze ko yatangiye ibikorwa by’urugomo n’ubwicanyi mu mwaka wa 1973.

Asanga ibi kandi ngo bizashimangira ubumwe bw’Abanyarwanda aho buri wese azajya arebamo mugenzi we Ubunyarwanda aho kumubonamo andi moko.

Ngaboyisonga Mukanyangezi Dative ushinzwe kugorora n’imibereho myiza n’uburenganzira bwa muntu mu rwego rw’igihugu rushinzwe amagereza (RCS) atangaza ko impamvu iyi gahunda ya “Ndi Umunyarwanda” bayisangije abagororwa ari ukugirango nabo babohoke mu mitima no ku ngoyi y’ibyaha bakoze nibaramuka batashye bazajyende batikandagira kandi bumva ko bagiye kuba mu sosiyete nyarwanda nta pfunwe bafite.

Ati “ari abakoze Jenoside bazaba barangije ibihano, cyangwa imirimo nsimburagifungo, ndetse n’abandi bazaba bafungiwe ibyaha bisanzwe bakwiye kwiyumvamo Ubunyarwanda kurenza uko bakwiyumvamo ubwoko butagize icyo bubamarira”.

Ikindi “Ndi Umunyarwanda” izafasha benshi mu bagororwa cyane cyane urubyiruko rwakoze Jenoside bazasobanukirwa amateka yaranze u Rwanda ndetse bakamenya ko ubutegetsi bubi bwariho icyo gihe ibyo bwabigishije ari amacakubiri yo kuryanisha Abanyarwanda.

Ibi baka barabisobanuriwe berekwa Filimi ishingiye ku mateka yaranze u Rwanda yakozwe na Minisitiri w’Intebe, Dr Habumuremyi Pierre Damien, aho benshi muri bo yabakomanze ku mutima bagahita batanga ubuhamya bw’ibyo bakoze mu gihe cya Jenoside na mbere yaho mu myaka yakozwemo itotezwa ry’Abatutsi.

Pasteur Karekezi Parfait wari wazanye n’intumwa ya RCS yigishije abo bagororwa ijambo ry’Imana aho yabasabye kwezwa bakanihana ibyaha bakoze kuko nibihana bazaba bababariwe.

Ikindi ngo bizabafasha kubana neza n’abo bazaba basanze mu muryango nyarwanda kandi bizabafasha no kudahora bicira urubanza rw’umutima.

Umuyobozi wa gereza nkuru ya Miyove, Niyomufasha Genevieve, avuga ko iyi gahunda izakomeza kujya yigishwa abo bagororwa kugirango n’ugifite urwikekwe mu mutima abohoke ingoyi y’icyaha bakoreshejwe n’ubuyobozi bubi bwariho icyo gihe ndetse bazajye muri sosiyete nyarwanda nta pfunwe bafite.

Ernestine Musanabera