Hari amakuru amaze iminsi akwirakwira mu bitangazamakuru avuga ko ibihugu bikomeye birimo na Amerika, byahagaritse inkunga byageneraga u Rwanda ariko Minisitiri Mushikiwabo yemeza ko uko byagenda kose Abanyarwanda bazabaho.

Minisitiri Mushikiwabo yagize ati: “Abanyarwanda tugomba kubaho kuko hari ibintu byinshi twagiye tunyuramo. Izi raporo tuzimaranye imyaka 18 (…) inkunga nihagarara tuzitunga”.

Mu kiganiro n’abanyamakuru, kuri uyu wa kabiri tariki 31/07/2012, cyavugaga kuri raporo y’umuryango w’abibumbye (UN) kuri Congo, Minisitiri w’ububanyi n’amahanga akaba n’umuvugizi wa Guvernoma yavuze ko aho u Rwanda rugeze rukoresha amafaranga atarenga 48% y’inkunga mu ngengo y’imari.

Kugabanya inkunga u Rwanda rukenera ku mahanga, byagezweho n’imbaraga z’Abanyarwanda n’ubuyobozi bwiza bwashyize ingufu mu miyoborere; nk’uko Minisitiri Mushikiwabo yabisobanuye.

Gusa ntiyabuze kuvuga ko inkunga arizo zafashije u Rwanda gutera imbere guhera mu 1994, ariko yongeraho ko zidakwiye gukoreshwa nk’agahato k’ibihugu byifuza gukoresha ibihugu bikennye ibyo byifuza.

Minisitiri Mushikiwabo yasabye Abanyarwanda kudaterwa ubwoba n’ibyo bumva ku ihagarikwa ry’inkunga, avuga ko ari ibikangisho by’ibihugu bizitanga kugira ngo bitegeke ibihugu bikennye ibyo byifuza.

Ibi yabijyanyishije na raporo ishinja u Rwanda ku gufasha umutwe wa M23, avuga ko Umuryango Mpuzamahanga ariwo uba uri inyuma y’ibyo bikorwa bitewe n’inyungu ubifitemo. Yatanze urugero rwa bimwe mu byagaragaye muri raporo nyamara bidashoboka ko biba mu Rwanda.

Urugero yatanze ni nk’intwaro ziri muri iyo raporo kandi ko izo ntwaro zitagikoreshwa mu Rwanda. Kimwe n’imyambaro iri mu mafoto, Minisitiri Mushikiwabo yavuze ko nta gihamya yagaragaza ko iyo myenda yaturutse mu Rwanda.

Emmanuel N. Hitimana