Mukarubega Zulfat uhagarariye MTN foundation yavuze ko izo mudasobwa zatanzwe tariki 27/10/2012 ziri muri gahunda MTN yihaye yo guteza igihugu imbere bibanda ku burezi n’ubuvuzi.

Umuyobozi wa APAPEB Nshimiyimana Philbert atangaza ko izo mudasobwa bahawe na MTN zizabafasha gufungura ishami ry’ikoranabuhanga muri icyo kigo.

Ati “ zizadufasha kwiga neza ndetse nta mwana uzajya asaranganya mudasobwa n’undi kandi buri mwana wese uzarangiza muri iki kigo azaba azi neza no gukoresha mudasobwa”.

Abana bazagira ubumenyi butandukanye biturutse mu bushakashatsi bwa Interineti ndetse n’ibindi muri rusange bazajyenda bavumbura.

Uhagarariye uburezi mu karere ka Gicumbi Uwamahoro Julliene asanga iki gikorwa MTN yakoze ari indashyikirwa kuko izi mudasobwa zizatuma hiyongera ubumenyi kuri abo banyeshuri ndetse no ku barezi babo muri rusange.

Asanga nta mwarimu watinda muri Dictionaire ashaka igisobanuro cy’ijambo kuko mudasobwa izajya ibikora ako kanya (automatic).

Yasabye abana gukunda gukora ubushakashatsi kuri izo mudasobwa kuko interineti iba ifite ubumenyi bwinshi ibitse kandi bwiza bwazabafasha gutegura amasomo yabo ndetse n’ibizamini bya Leta.

Abanyeshuri biga nabo muri icyo kigo bishimiye iyo nkunga kuko hari byinshi bazigiraho kuri izo mudasobwa.

Ernestine Musanabera