Mu mahugurwa abo bakozi bazamaramo ibyumweru bibiri guhera ku wa mbere tariki 23 Werurwe 2015, barateganya kwiga amasomo 12 arimo kumenya kwitegura gushinga urugo, kwimakaza ibiganiro mu muryango, kugira uruhare mu kongera no gucunga neza umutungo w’urugo, kubahiriza uburenganzira bwa buri wese mu muryango no kugendera ku ihame ry’uburinganire n’ubwuzuzanye.

Bazasabwa kandi kujya kwigisha abubatse ingo kunoza imibonano mpuzabitsina (umugore n’umugabo we), kuboneza urubyaro, kwirinda ibiyobyabwenge n’ingeso mbi, kumenya ibijyanye n’iterambere ry’umugore, gukumira amakimbirane n’ihohoterwa mu muryango, ndetse no guha abana uburere buboneye.

Umuyobozi muri MIGEPROF ushinzwe iterambere ry’umuryango n’uburenganzira bw’abana, Alfred Karekezi, yasobanuye ko ibi biganiro bikubiye mu bice bibiri, ari byo icyitwa ”Noza imibanire mu muryango wawe” hamwe n“uburyo bwo kwinjiza ihame ry’uburinganire muri gahunda zitandukanye” bizafasha gukumira imibanire mibi mu ngo.

Karekezi yagize ati “Nta nyigo yakozwe ariko wumva ngo umugabo yarwanye n’umugore yamwishe, ukumva imibare y’ihohoterwa itangwa na Polisi, ukumva abantu benshi barahanwa; muri make ibibazo birahari ariko icyo tugamije ni ugukumira ko haba ibindi bikomeza kuvuka”.

Umukozi wa MAJ mu Karere ka Rwamagana, Peace Batamuriza, yatangarije abanyamakuru bahura n’ibibazo binyuranye biterwa imibanire mibi mu ngo.

Ati “Twakira abantu benshi bafite imibanire mibi cyane, benshi baza bahohotewe bishingiye ku mitungo, ababanye badasezeranye aho umugabo ata umugore n’abana akajya gushaka undi mugore bagasezerana, bakavanga umutungo umugabo yashakanye na wa mugore wa mbere”.

MIGEPROF ngo irashaka ko aba bakozi bayo mu turere hamwe n’aba Minisiteri y’ubutabera, bazajya gutanga ibiganiro mu nama bakorana n’abaturage, haba mu mugoroba w’ababyeyi, nyuma y’umuganda cyangwa n’undi mwanya bazajya babona, bakigisha abaturage kubana neza.

Simon Kamuzinzi