Ministiri w’Abakozi ba Leta n’Umurimo, Judith Uwizeye, yasabye abashinzwe gucunga abakozi mu nzego za Leta n’iz’abikorera, bari mu nama y’iminsi ibiri i Kigali, gutekereza ku buryo bworohereza abakozi gutanga umusaruro mwinshi.

Minisitiri w’Abakozi ba Leta n’Umurimo, Uwizeye Judith, asanga gukoresha umukozi cyane amasaha y’ikirenga bigabanya umusaruro yagombaga gutanga (Photo archive).

Ati "Biteganijwe ko iyo umuntu yakoze amasaha y’ikirenga, ayasubizwa mu buryo bw’ikiruhuko cyangwa agahabwa amafaranga yiyongera ku mushahara we, abyumvikanyeho n’umukoresha we".

Ministiri Uwizeye avuga ko umukozi wananiwe adashobora gutanga umusaruro wifuzwa ku munsi ukurikiye uwo yagiriyeho imirimo myinshi. Mu nzego z’abikorera ngo ni ho iki kibazo cyo gukoresha abantu amasaha y’ikirenga kirimo kugaragara cyane.

Umwe mu bakora mu itangazamakuru wumvise ibisabwa na MIFOTRA, yagize ati "Jyewe ngomba kuba nageze ku kazi saa mbiri za mu gitondo, ngategekwa gutaha nyuma ya saa mbiri z’ijoro, kandi ku mushahara wanjye udahagije ntacyo bongeraho na gito".

Abashinzwe imicungire y’abakozi mu nzego za Leta n’izigenga (Photo archive).

Karangwa Steven, ukuriye ishyirahamwe rihuza abashinzwe gucunga abakozi mu Rwanda, ntabwo ahakana ko hari abakora amasaha y’ikirenga, kuko ngo igihugu kirimo gutera imbere.

Aganira n’itangazamakuru yagize ati "Ariko ntiwagombye gukora birenze ubushobozi bw’umubiri wawe; umukoresha agomba kumenya ko niba ukererewe ku kazi bitewe n’uko waraye utashye utinze, atari ikosa riguturutseho."

Simon Kamuzinzi