Intambara yarangiye muri Kibumba saa tatu impunzi z’abanyecongo zari mu Rwanda zahise zisubirira mu gihugu cyazo gusanganira ingabo zabo zari zimaze kwigarurira umusozi wa Gasizi M23 yari iriho.

Kigali Today ivugana n’abaturage bagiye Kibumba na Gasizi kwakira ingabo za FARDC bavuga ko batunguwe no kumva ingabo za Congo zafashe Kibumba na Gasizi zimwe zivuga Ikinyarwanda nka bo naho abandi ntibazi igiswahili, iringana n’igifaransa ahubwo baravuga icyesipanyolo.

Ingabo zarimo zirwanya M23 harimo abavuga Ikinyarwanda.

Abaturage bababonye bavuga ko izi ngabo zirimo ibice bitandukanye bitewe n’indimi zivuga, impunzi z’abanyecongo zari zahungiye mu Rwanda zikaba zari zanze kujya mu nkambi ya Nkamira zivuga ko zaburiwe ko nyuma yo kwirukanwa kwa M23 FDLR izatera mu Rwanda.

M23 yirukanywe mu duce yarimo nka Kiwanja, Rutshuro na Kibumba na Rumangabo mu minsi itatu, mu gihe M23 yari yahawe iminsi itanu, gusa amakuru atangazwa n’abaganga bari Goma aravuga ko inkomere ku rugamba ari nyinshi.

Umwe mu mibare umunyamakuru wa Kigali Today yahawe n’abaganga ba FARDC iravuga ko inkomere zigera kuri 287 naho abapfuye umubare ntutangazwa kubera ubwinshi n’ahantu hatandukanye bagiye barwanira, cyakora mu gace ka Kibumba ngo imirambo yabaruwe igera kuri 90 irimo n’abasirikare bafite ipeti rya Lt Colonel na Majoro.

Umusirikare wa Tanzania ufite ipeti ry Lietenant waguye ku rugamba Kiwanja.

Uyu muganga nawe avuga ko nyinshi mu nkomere avura atari abanyecongo ahubwo ari abanyamahanga, iyi ntambara ikaba irangiye umusirikare wa Tanzaniya wari mu mutwe udasanzwe wa MONUSCO waje kurwanya inyeshyamba yitabye Imana.

Abarwanyi ba M23 bavuga ko bavuye mu mijyi barimo kuko ingabo za Congo zabarushije ibikoresho nk’imidoka za gisirikare n’ibitwaro bya rutura bahitamo kwigira mu ishyamba ry’ibirunga aho nta bimodoka bihagera ngo bahabasange baharwanire ariko ntibatangaje umubare w’ababo baguye ku rugamba cyangwa ngo bakomereke.

Sylidio Sebuharara