Mu gihe cy’ibyumweru bibiri abantu bane bagerageje kwiyahura banyweye umuti wica udukoko mu myaka. Umwe yitabye Imana naho batatu bajyanywe ku ivuriro baravurwa barakira ku buryo ubu nta kibazo bafite. Uwo batabashije kurokora ni uwitwa Eliezer Ngendo.

Ubusanzwe bimenyerewe ko abantu bakunze kwiyahura n’ababigerageza, biba byatewe n’ibibazo bitandukanye barimo mu ngo zabo cyangwa se bikaba biturutse ku kunywa ibiyobyabwenge, ariko bimaze kugaragara ko bishobora kuva kuzindi mpamvu zitandukanye.

Mureruza Beata umwe mu bagerageje kwiyahura Imana igakinga ukuboko yagize ati “kwiyahura nabitewe no gutekereza ku bavandimwe banjye bishwe mu gihe cya Jenoside yakorewe Abatutsi; ibyo byakomeje kunsikamira umutima nkabura amahoro sinishime na gato”.

Akomeza avuga ko we n’umugabo we nta bibazo bafitanye cyatuma yumva ashaka kwiyambura ubuzima. Gusa gufata iki cyemezo ngo yabonaga nta yandi mahitamo yari afite kuko yibukaga abe bishwe nawe akumva ntaho asigaye.

Ntahidakiriza Janvier nawe ngo yashatse kwiyahura ariko bamubona hakiri kare ajyanwa kwa Muganga aravurwa arakira. Twagirayezu Onesphore umuturanyi wa Janvier avuga ko intandaro yo kwiyahura kwa mugenzi we yaba ari amakimbirane afitanye n’umugore.

Abaturage bo mu murenge wa Mugombwa bavuga ko undi witwa Mudashimwa Jean Marie Vianey yagerageje kwiyahura mu ijoro rishyira tariki 27/06/2012. Uyu yatabawe n’umugore we Bihoyiki Mariyana afatanyije n’abaturanyi ubwo yagerageza kwiyahura bagatesha, ariko ntibatangaje icyabimuteye.

Mu rwego rwo gukumira ibyo bikorwa hafashwe ingamba zo gukomeza kwigisha abaturage bakarushaho kwigirira icyizere; nk’uko bisobanurwa na Bede John, Umunyamabanga nshingwabikorwa w’umurenge wa Mugombwa.

Ikindi bakora ni ugusura ingo zibanye nabi bazikangurira kubana neza, kandi bagasaba abaturage gutanga amakuru y’aho ingo zifite ibibazo ziherereye kugira ngo abantu babashe gusurwa ntawe urivutsa ubuzima.

Kwiyahura ntibyari bisanzwe mu murenge wa Mugombwa. Muri rusange mu karere ka Gisagara hari urwego rw’impuruza, aho buri muturage agira uruhare mu gutanga amakuru ku bibera mu karere ndetse n’aho basanga ikibazo bakabitangaza kare.

Ibyo byafashije mu gikorwa cyo gutabara no kugeza kwa muganga bariya batatu biyahuye ariko ntibagere kuri uwo mugambi wo kwiyambura ubuzima.

Clarisse Umuhire