Ibi babitangaje kuri uyu wa 24/10/2015 nyuma yo gusura indake Perezida wa Repubulika y’u Rwanda Paul Kagame yabagamo ndetse hamwe n’abandi bayobozi b’u Rwanda bafatanyije nawe kubohora u Rwanda.

Indake Perezida wa Repubulika Paul Kagame yabagamo mu gihe cy’urugamba rwo kubohora u Rwanda

Uwimana Virginie Uhagarariye urugaga rw’abagore rushamikiye ku Muryango wa RPF inkotanyi mu karere ka Kicukiro yatangaje ko nyuma yo gusura ahantu hatandukanye hari amateka agaragaza urugamba rwo kubohora u Rwanda ku Mulindi w’intwari byamweretse ko Perezida Kagame ndetse n’ingabo zose bafatanyije urugambaga bakuye u Rwanda ahantu hakomeye.

Abanyamuryango ba RPF Inkotanyi bava mu ndake kureba uko hameze

Ati “ Numvaga indake nkumva ntabyumva neza ariko nabonye ko igihugu cyacu bagikuye ku bwitange bukomeye, niyo mpamvu dushimira perezida wacu aho agejeje Abanyarwanda”.

Ibuye ry’ifatizo ryashyizweho na Perezida wa Repubulika Paul Kagame

Ndabarasa William akuriye urugaga rw’urubyiruko mu muryango FPR Inkotanyi mu karere ka Kicukiro kuri we ngo yatangajwe no kubona indake umukuru w’igihugu cy’u Rwanda yabayemo mu gihe cy’urugamba bimuha isomo nk’urubyiruko ko bagomba kurinda ikintu cyose cyatuma u Rwanda rwongera gusubizwa inyuma mu bikorwa by’iterambere.

Aha basobanurirwaga amateka y’indake ya Perezida Paul Kagame

Nk’urubyiruko rugomba kuba imbaraga n’amaboko by’u Rwanda kandi bagakomeza gufatanya mu kubaka u Rwanda kuko ababohoye igihugu yabonye ko babigezeho kubera ubwitange no kwigomwa byinshi kugira ngo baharanire amahoro n’ubumwe by’Abanyarwanda.

Indake Gen Kabarebe James Minisitiri w’ingabo

Ati “ Nkanjye urubyiruko byampaye isomo ko tugomba gukomeza gusigasira ibyo tumaze kugeraho tugakomeza urugamba rw’iterambere.”

Umuyobozi w’Akarere ka Kicukiro Jules Ndamage yatangaje ko uruzinduko bagize ku banyamuryango ba RPF Inkotanyi ari uburyo bwo kongera guha agaciro no kumenya ukuri ingabo z’u Rwanda zarwaniraga.

Ukuri avuga ni uko guha Abanyarwanda agaciro no kubaha kuba mu gihugu gitekanye kandi gifite amahoro.

Bagabira umuturage inka

Abanyamuryango ba RPF kandi baremeye n’umuturage utishoboye witwa Mukangwije Marie Christine wo mu murenge wa Kaniga aho bamugabiye inka yo korora kugira ngo izamufashe kumuzamura mu mibereho myiza y’urugo rwe.

Ernestine Musanabera