NURC ivuga ko ikeka ko ubwicanyi buvugwa mu ngo n’ubukorerwa abarokotse Jenoside yakorewe abatutsi mu 1994 n’abandi; byaba birimo guterwa n’ingaruka z’ibyabaye mu Rwanda muri uwo mwaka, nk’uko byatangajwe na Perezida w’iyo komisiyo, Musenyeri John Rucyahana, mu kiganiro yahaye abanyamakuru kuri uyu wa gatanu tariki 20/2/2015.

Abayobozi ba Komisiyo ishinzwe ubumwe n’ubwiyunge, mu kiganiro n’abanyamakuru kuri uyu wa gatanu.

Yagize ati “Dufite ikibazo cy’ihohoterwa ririmo gukorwa, aho mu turere tumwe wumva buri munsi, umugabo wishe umugore, umugore wishe umugabo, umwana yishe umubyeyi, abarimo kwica abarokotse Jenoside; turimo kwibaza ku kintu kizamuye ubugome bukabije muri iki gihe; icyakora iyo igihugu cyakoze amahano nk’ayo twakoze, hari ingaruka ziza nyuma.”

Ubu bwicanyi ngo burenze ikibazo cy’amoko, nk’uko NURC ivuga ko yasanze impamvu zibutera zitandukanye; ariko hakibazwa niba abantu bamaze gufungurwa, baba atari bo ntandaro y’ibyo bikorwa bigayitse, nk’uko Umunyamabanga nshingwabikorwa wa NURC, Dr Jean Baptiste Habyarimananawe yabisobanuye.

Abanyamakuru bitabiriye ikiganiro cya NURC.

NURC ivuga ko mu 2003 hafunguwe abantu bari bakurikiranyweho Jenoside bagera ku bihumbi 25, nyuma yaho kugeza ubu hakaba hamaze gufungurwa abarenga ibihumbi 50, umubare yemeza ko ushimishije.

Mu bushakashatsi buzakorwa muri uyu mwaka kandi, ngo hazasuzumwa uruhare gahunda ya Ndi Umunyarwanda yagize mu kubanisha neza abaturage, ibiganiro kuri iyo gahunda bikaba bikomeje.
Komisiyo y’ubumwe n’ubwiyunge ihamya ko kuba ngo abavuye mu magereza bagera kuri 90% barakiriwe bakaba banabanye neza n’abo bahemukiye, byatewe ahanini no kwigisha abaturage muri gahunda ya Ndi Umunyarwanda.

Simon Kamuzinzi