Iyo modoka yo mu bwoko bwa Pic-up ifite plaque RAC 502 S yagonze umwana witwa Ndayiragije Aristide w’imyaka 14 mwene Nkeshamugabe Céléstin na Bategure Domina bo mu kagari ka Gahama mu murenge wa Kirehe .

Hakizimana Jean Marie Vianney Umunyamabanga nshingwabikorwa w’Akagari ka Kirehe avuga ko imodoka yari ifite umuvuduko ukabije.

Ati “Hari mu ma saa tanu mu mvura, imodoka iza ifite umuvuduko ukabije ikase ikoni iranyerera yiroha munsi y’umuhanda igonga umwana w’umunyeshuri”.

Akomeza avuga ko bahise bajyana uwo mwana n’abantu batatu bari muri iyo mdodoka mu bitaro bya Kirehe ariko umwana akomeza kuremba bakimugeza CHUK ahita apfa”.

Ngabonziza Emmanuel wari hafi y’umuhanda iyo mpanuka iba, yavuze ko imodoka ikimara kurenga umuhanda bahise batabara basanga abantu bari mu modoka babura ubuvamo bagerageza kubakuramo ariko kubera ko umwana imodoka yari yamunyuze hejuru bamubona nyuma bihutira kumugeza mu bitaro bya Kirehe.

Yakomeje kuvuga ko uwo mwana yaviriye mu nda ku buryo bamugejeje mu bitaro bya Kirehe ameze nabi umutwe watangiye kubyimba udashobora kumenya isura ye ahita yoherezwa CHUK.

Umunyamabanga Nshimgwabikorwa Hakizimana asaba abashoferi kugabanya umuvuduko ati“ turi mu itangira ry’amashuri abana ni benshi mu muhanda, rwose abashoferi bagendere ku muvuguko muke kuko impanuka zikomeje gutwara ubuzima bw’abantu”.

Ubwo twakoraga iyi nkuru ababyeyi b’umwana bari bategereje ko umurambo ugezwa i Kirehe mu gihe abari muri iyo modoka ubwo yakoraga impanuka bari kuvurirwa mu bitaro bya Kirehe.