Lit Col Eugène Karegeya, Umuyobozi w’Ingabo mu turere twa Kirehe na Ngoma yasabye urubyiruko kwirinda ibiyobyabwenge n’ingeso mbi kuko ngo biri mu byakururiye urubyiruko kwishora mu bwicanyi.

Ati “Kuva 1990 kugeza 1994 urubyiruko rwahabwaga urumogi ngo rwishore mu ntambara rugera naho rubyigamba ku maradiyo nka RTLM bavuga ko babonye ingufu zo guhiga inyenzi kuko bamaze kunywa agatabi ko ku mugongo w’ingona, bakiroha mu masasu batazi ibyo barimo.”

Yavuze ko igihugu aho kigeze kidashaka urubyiruko rwitwara gutyo. Yagize ati “Hagize ugushuka ngo nywa itabi uraba intwari mwirinde kuko uwanyweye ibyo nta buzima aba afite, unywa urumogi ntaho aba ataniye n’umwiyahuzi kandi mwe igihugu kibatezeho byinshi.”

Murekatete Jacqueline, Umuyobozi w’Akarere ka Kirehe Wungirije ushinzwe Imibereho Myiza y’Abaturage, na we yasabye urubyiruko kuva mu ngesoo mbi birinda ibishuko.

Ati “Twumva ba sugar mummy na ba sugar daddy bashuka urubyiruko bakarujyana mu ngeso mbi, igihe cyose wemeye gushukwa ugakozwa ibibi menya ko ingaruka mbi zigutegereje. Ibaze gutangira ibinini bya SIDA uri umwana warabigizemo.”

Yakomeje abasaba kwiga bakabyaza umusaruro amahirwe igihugu kibaha anababwira ko Umunsi Mpuzamahanga wahariwe Urubyiruko ku isi ari ugusubiza amaso inyuma bagakosora ibibi.

Mu kiganiro cyatanzwe na Gakuru Jean de Dieu, Umutahira w’Intore mu Karere ka Kirehe, yasabye urubyiruko gukunda igihugu barangwa n’indangagaciro z’Abanyarwanda, umurimo unoze n’ibindi bikorwa byubaka igihugu.

Muri ibyo birori hamuritswe ibikorwa bimwe na bimwe by’ubusudizi, ubukorikori,ubuhinzi n’ubworozi bikorwa n’urubyiruko. Insanganyamatsiko y’uyu mwaka igira iti“Twahisemo kuba umusingi w’iterambere.”

Servilien Mutuyimana