Uwo musaza w’imyaka iri hejuru ya 80 utuye mu kagari ka Mucyimba yemeza ko ubu yumva asa n’uzutse abikesheje Leta y’ubumwe. Nubwo iyo nzu ye itaruzura ariko byibuze ngo afite icyizere ko agiye kuva mu kabande agasanga abandi baturage ahegereye umuhanda.

Abisobanura muri aya magambo: “Ndumva ku mutima wanjye hakeye, mumvanye mu kabande munzana ku mudugudu hamwe n’abandi ku muhanda, ubu nzajya mbasha gufata akabando njye ku muhanda mbonane n’abategetsi n’abandi baturage, ariko hariya mu kabande nasaga nk’uwigunze”.

Umusaza Murikamahiri akomeza avuga ko ibi byose abikesha Leta ya Kagame Paul ariko agasaba ko bazanamufasha kubona amafaranga ya mutuel kuko atishoboye.

Umuyobozi w’akarere wungirije ushinzwe imibereho myiza muri Karongi, Mukabalisa Simbi Dative, yahise amwizeza ko ikibazo cye kizakemurwa bidatinze.

Igikorwa cyo kubakira uyu musaza cyabaye tariki 18/09/2012 cyari muri gahunda yo gutuza neza abaturage batuye ahantu habi hashyizwe mu rwego rw’ahashobora kwibasirwa n’ibiza; nk’uko bisobanurwa n’umuyobozi w’akarere ka Karongi, Kayumba Bernard.

Ibarura ry’akarere ryerekanye ko abantu batuye nabi ari 6690, bose bagomba kwimurwa bagatuzwa mu midugudu bitarenze mu kwezi kwa gatatu 2013.

Ni byo umuyobozi w’akarere asobanura: “twaje mu murenge wa Rugabano gutangiza icyo gikorwa kugira ngo binaduhe ubumenyi bwo kuzajya kuganira n’indi mirenge tuyigira inama uburyo iki gikorwa twakinjiramo n’imbaraga. Hano twasije ibibanza bitandatu, tuzamura n’inzu y’umusaza utishoboye”.

Muri Rugabano habarirwa imiryango 1124 ituye nabi, ubu hamaze gukatwa ibibanza 1013, kuri byo 730 byamaze guhabwa abantu.

Ngo hari icyizere ko bizagera tariki 30/03/2013 baramaze gutuza imiryango 3200 yose mu midugudu; nk’uko bisobanurwa n’umuyobozi w’umurenge wa Rugabano, Niyihaba Thomas.

Gasana Marcellin