Buri nzu ifite ibyumba bitatu na salo ndetse ikagira igikoni n’ikigega gifata amazi. Aya mazu yubakishije rukarakara, ateye karabasasu inyuma, mo imbere hasi arimo sima (pavement) kandi asakaje amabati.

Ubwo hamurikwaga amazu atanu yubatswe mu Mudugudu wa Kabuga mu Kagari ka Murangara ho mu Murenge wa Mubuga abaturage bashimiye Leta y’u Rwanda n’ingabo z’igihugu kuko ngo bakomeje kubafasha guhangana n’ingaruka batewe na Jenoside yakorewe Abatutsi.

Mukantabana Jeanne, umubyeyi wo mu kigero cy’imyaka nka 35 ufite umugabo n’abana babiri yagize ati “Mbere twabagaho mu mibereho mibi. Twahoraga turi mu macumbi rimwe na rimwe bakadutera bugune (gusohorwa mu nzu nta nteguza kubera kubura ibyo bishyura) tukabura umutekano ariko kuba narabonye inzu nkaba nca incuro nkabona aho nyitwara mbishimira imana.”

Uyu mubyeyi “guterwa bugune”ashaka kuvuga akaba ari uruko gusohorwa mu nzu nta nteguza kubera kubura ibyo bishyura.

Naho umugabo we Ayinzira Eduard mu byishimo byinshi bivanze n’ikiniga yaterwaga n’ubuzima babagamo avuga ko bakize kuraraguzwa bacumbika bityo akaba ashimira ababibutse bakabubakira.

Agira ati “Nabayeho nabi kuva intambara yatangira, (arimyoza n’ikiniga) imaze kurangira ndagenda gutya mba mu gihuru birarangira nkivuyemo mba mu icumbi birarangira (yongera kwimyoza n’amarira azenga mu maso) nyuma baza kumbwira bati ‘ngwino tukwereke ahantu uzaba mbaza kubipinga none dore bampaye inzu nziza”.

Ayinzira akomeza ashimira Leta y’u Rwanda n’ingabo z’u Rwanda avuga ko kuva abonye aho ahengeka umusaya, umugore n’abana bakaba bazajya babona aho baryama ngo bimuha icyizere ko ibibazo bye bitangiye gukemuka.

Umuyobozi w’Inkeragutabara mu Ntara y’Uburengerazuba, Brig. Gen. Eric Murokore, yabwiye abo baturage ko iki gikorwa bagikoze babisabwe na MINALOC kuko ngo ingabo z’u Rwanda ari zo zumva cyane uburemere bw’ibibazo abaturage bafite.

Yagize ati “Impamvu babisabye ni uko ngirango ingabo z’u Rwanda zumva ikibazo uko kimeze kurusha abakorera inyungu zabo. Twebwe nta nyungu zindi dukorera uretse gutabara abaturage nk’uko twiyemeje kubikora n’ubundi”.

Brig. Gen. Murokore yakomoje ku kibazo cya ba rwiyemezamirimo bubaka amazu y’abatishoboye bamara kuyamurika akagwa hadateye kabiri. Akaba yizeza abaturage batishoboye bahawe inzu ko amazu bahawe akomeye akaba atameze nk’ayo yubakwa n’abo bayasondeka bagamije inyungu zabo.

Brig. General Murokore yasabye aba baturage gufata neza amazu bubakiwe kugira ngo atazangirika dore ko yatwaye amafaranga n’ingufu nyinshi kuko buri inzu muri izo ifite agaciro k’amafaranga abarirwa muri miliyoni z’irindwi z’amanyarwanda (7,000,000Rwf).

Naho Umuyobozi w’agateganyo w’Akarere ka Karongi, Hakizimana Sebastien, ashimira Inkeragutabara iki gikorwa kuko ngo bigaragara ko ari ukwita ku guteza imbere imibereho myiza y’umuturage.

Hakizimana yagize ati “Ni agaciro gakomeye cyane cyane k’abantu badafite aho baba babagaho bakodesha cyangwa bacumbitse ariko uyu munsi buri muturage afite inzu ye kandi inakoze neza. Bigaragaza ko iki ari igikorwa gishimishije kinatuma imibireho myiza ikomeza gutera imbere”.

Ubuyobozi bw’Inkeragutabara mu Ntara y’Uburengerazuba buvuga ko amazu 17 yamuritswe ari icyiciro cya mbere. Mu cyiciro cya kabiri ngo bakaba bazubaka andi agera kuri 15 yose hamwe akaba 32.

Uretse mu karere ka Karongi ngo ibikorwa nk’ibi byo kubakira abatishoboye Inkeragutabara zirimo kubikora mu gihugu hose.

Niyonzima Oswald