Intore za Akagari ka Gihinga zasobanuriye Umunyamabanga wa Leta ko ziri mu gikorwa cyo kubarura ingo zigize akagari ka bo, zuzuza ifishi iriho amakuru akenewe kugira ngo hamenyekane uko urugo ruhagaze na gahunda rukwiye gukorerwaho ubukangurambaga.

Urutonde rw’ingo za buri kagari rusanzwe ruzwi, ariko iryo barura rigamije gutanga amakuru ahagije ku ngo zibana zitarasezeranye, izidafite ubwiherero, izidafite akarima k’igikoni n’ibindi bibazo bijyanye n’imibereho, nk’uko umuyobozi w’akarere ka Kamonyi, Jacques Rutsinga yabisobanuye.

Dr. Mukabaramba yasabye izi ntore ko nyuma y’ibarura bazicara bakarebera hamwe ibibazo bagiye basanga muri buri rugo, bakigira hamwe ubufasha bashobora gutanga, bagendeye ku mihigo bari barihaye ubwo basozaga itorero.

Amiel Uwitonze, uhagarariye izo ntore, yavuze ko uretse ibarura ry’ingo, hateganyijwe gukorwa ibindi bikorwa by’imirimo y’amaboko nk’umuganda, uturima tw’igikoni, ibikorwa by’isuku. Bakazigisha itorero ryo mu mudugudu no gukora ubukangurambaga kuri gahunda zitandukanye z’iterambere.

Mu mbogamizi bahura nazo, ni ukubangamirwa n’imyumvire ya bamwe mu baturage usanga batabakira neza n n’imvura ijya ibabuza kujya gukora. Dr Mukabaramba yasabye inzego z’ubuyobozi kumenyesha abaturage ibikorwa by’intore.

Akagari ka Gihinga gafite intore ziri ku rugerero 39, mu gihe mu karere kose hari intore zigera ku 1.158.

Marie Josee Uwiringira