Iyi Gahunda KT Radio iteganya kugeza ku baturage ihuye n’ibyo abaturage twaganiriye bifuza ku itangazamakuru nk’uko twabitangarijwe n’abaturage bo mu karere ka Nyabihu.

Abamaze igihe bumva iyo radiyo yari iri mu igeragezwa bifuza ko abanyamakuru bayo basanzwe bakorera mu turere twose tw’u Rwanda barushaho kumanuka bagasanga abaturage aho batuye KT Radio ikababera ijwi kandi ikababera ubuvugizi ku cyatuma batera imbere.

Faustin ukora umurimo w’ubuhinzi avuga ko ubusanzwe bumvaga amaradiyo menshi ariko bakanumva kenshi hari izisoma mu binyamakuru bitandukanye biba byasohoye amakuru, akumva bibanze ku yasohotse ku rubiga www.kigalitoday.com.

Kuri we inkuru y’uko Kigali Today Ltd yanashyizeho radiyo yayo ngo yayakiriye neza kuko agiye kwiyumvira neza amakuru yayo nyirizina, avugwa n’abanyamakuru bayo mu mwimerere wayo, adasomwe gusa n’ibindi bitangazamakuru.

Ikindi kandi ngo nubwo bo bataratera imbere cyane mu buhinzi, KT Radio iramutse igiye ikorana ibiganiro n’abateye imbere mu buhinzi n’abagoronome bakajyira inama abahinzi ku buryo bajya bahinga ibihingwa bitandukanye, byabafasha nk’abahinzi.

Gusa ibi bikananyuraho mu masaha ya mu gitondo bwenda guca,bna nimugoroba abantu bagiye kuryama,bkuko ariho hakunze kuboneka akanya. Ikindi yifuza ni amakuru yo hirya no hino kandi acukumbuye yabafasha kumenya uko mu Rwanda no ku isi bihagaze.

Umusore witwa Niyotwagira avuga ko ategereje ibiganiro bivugira abasore ku bijyanye no koroherezwa kwihangira imirimo dore ko igishoro cyabaye ingume ku basora. Barifuza ko radiyo yabakorera ubuvugizi kuri Leta ngo n’urubyiruko rwo mu cyaro rurusheho kwitabwaho akaba ariyo yumva yarushaho kumunezeza.

Ikindi ategereje kuri Kt Radio ni ibiganiro bya Gikristo hatibagiranye n’urubuga rw’imikino.

Umwe mu bana biga mu mashuri abanza nawe yazamuye ijwi rye maze avuga ko akeneye cyane Radio yajya ishyiraho ibiganiro by’abana, bibajijura kandi bibashishikariza kwiga bashyizeho umwete.

Umwe mu bajyanama b’ubuzima yadutangarije ko kuri Kt Radio ategerejeho ibiganiro by’ubuzima n’uburezi kuko n’ubundi asanzwe aribyo akunda mu buzima busanzwe. Anavuga ko iyo bumvise ibiganiro nk’ibyo bibafasha, cyane cyane iyo bumva hari abatanga ibitekerezo ku buryo imirimo bakora yo kwita ku baturage yagenda neza.

Ikindi asaba ni uko KT Radio yazajya yumvikana hose kuko hari amaradiyo menshi mu Rwanda atumvikana.

Uretse umurongo wa 96.7 FM, KT Radio yatangiye ivugiraho, mu minsi iri imbere ikazanavugira ku yindi mirongo kuburyo izabasha kumvikana mu gihugu hose kandi inumvikanira ku murongo wa internet www.ktradio.rw.

Safari Viateur