Uru rubyiruko ruturuka mu turere tugize Intara y’Amajyaruguru yose ndetse hiyongereyeho n’akarere ka Nyabihu ari naho iyi ngando irimo kubera.

Buri mwaka itorero ry’Abadivantiste b’umunsi wa karindi riteganya ingando y’urubyiruko ifasha urubyiruko kugira imyitwarire myiza hagendewe ku nkingi eshatu: ukwiga iby’umwuka, iby’ubwenge n’iby’umubiri; nk’uko bisobanurwa n’umuyobozi w’urubyiruko muri iryo torero mu Ntara y’Amajyaruguru, Mutuyimana Nkundakozera.

Urubyiruko rwigishwa iby’umwuka, iby’ubwenge n’umubiri kugira ngo bibafashe kwiyubakira ejo hazaza heza.

Ubusanzwe urubyiruko rw’abadivantiste ruri mu byiciro bine bitewe n’imyaka rugiye rugaragaramo. Ubusanzwe hakorwaga ingando hatagendewe cyane ku myaka yarwo, ariko kubera insanganyamatsiko y’uyu mwaka “urubyiruko ruzima ahazaza heza” mu ngando y’uyu mwaka hafashwe urubyiruko guhera ku myaka 16 kugeza kuri 35 no hejuru yayo.

Mutuyimana avuga ko nk’itorero bafite inshingano ikomeye cyane yo kwita ku rubyiruko, iki cyiciro kigahabwa imbaraga, kuko arirwo torero, niwo muryango w’ejo hazaza kandi nirwo baturage bazubaka igihugu.

Iyo akaba ariyo mpamvu itorero risabwa cyane kwigisha urubyiruko indangagaciro umwana w’Imana akwiye kugira mu buryo rusange hagendewe ku ijambo ry’Imana, ndetse urubyiruko rukigishwa indangagaciro na kirazira zikwiriye kuranga Umunyarwanda mu rwego rwo kurutegurira ejo hazaza heza.

Umuyobozi w’urubyiruko rw’Abadivantiste mu Ntara y’Amajyaruguru avuga ko nk’itorero bafite inshingano zo kwita ku rubyiruko nk’ejo hazaza heza y’itorero n’igihugu.

Uretse amasomo y’iby’iyobokamana yibandwaho, urubyiruko runigishwa cyane amasomo ajyanye n’imyitwarire rwagakwiriye kugira mu buzima busanzwe kugira ngo koko rube intangarugero aho ruri hose no mubyo rukora byose, kandi rwigishe n’abandi bityo rube urubyiruko ruzima, ruzagira ejo hazaza heza.

Amwe mu masomo yitabwaho cyane ni ayo kwirinda ingeso zikunze kumunga urubyiruko nk’ubusambanyi, ibiyobyabwenge, filimi zangiza ibitekerezo by’urubyiruko n’ibindi; nk’uko Mutuyimana abivuga.

Mu masomo urubyiruko rukaba rwerekwa ibibi byabyo n’ingaruka zabyo kuri bo bityo bakifatira icyemezo cyo kubyirinda.

Bamwe mu rubyiruko rwitabiriye izi ngando badutangarije akamaro kayo kuri bo ndetse n’icyo ibyo bahigira bizabamarira mu buzima bwabo.

Chef guide Ayinkamiye Josiane avuga ko yigishijwe ko nk’abadivantiste batagomba kubera ikibazo igihugu ahubwo bagomba kukibera igisubizo. Kuri we ngo agiye kuba umusemburo wo gukangurira urubyiruko bagenzi be kwirinda ibyabangiza nk’ibiyobyabwenge n’izindi ngeso mbi zakwangiza ejo hazaza habo.

Abagera kuri 600 baturuka mu ntara y’Amajyaruguru bitabiriye ingando z’urubyiruko rw’itorero ry’abadivantiste zibera mu karere ka Nyabihu.

Maniriho Emmanuel, yavuze ko ingando yigiyemo iby’umwuka byamufashije kumenya uko yakwirinda ibibi byose. Ati “iyo umuntu abaye umukristo aba ari n’umunyagihugu mwiza”.

Kuri we asanga yaramenyeyemo uburyo yakoresha ibitekerezo bye kugira ngo yigirire akamaro akagiririre n’abandi. Ikigeretse kuri ibyo ngo yigiyeho n’uburyo bwo kwicungira amagara mazima n’uburyo yafata umubiri we neza.

Iyi ngando y’urubyiruko 600 ruturuka mu karere ka Burera, Gakenke, Musanze na Nyabihu, yaratangiye kuwa 25 Ugushyingo 2012,ikazasozwa kuwa 02 Ukuboza 2012.

Safari Viateur