Ubwo aba banyeshuri 15 n’umwarimu wabo professor Allan Thompson basuraga ibiro ntaramakuru bya Kigali Today ku gicamunsi cyo kuwa 26/05/2014, bavuze ko abakora umwuga w’itangazamakuru baganira nabo mu Rwanda bababwira ko amategeko y’u Rwanda ateye neza atanga urubuga rusesuye rwo gutara no gutangaza amakuru kandi bakaba batarumva umunyamakuru wabuze amakuru yayasabye, cyangwa uwahohotewe ari mu kazi ngo inzego za Leta zirengagize kumuha ubutabera.

Aba banyeshuri babajije impamvu imiryango mpuzamahanga ikunze gushyira u Rwanda ku rutonde rw’ibihugu bibangamira ubwisanzure mu itangazamakuru no gutangaza ibitekerezo bwite, umuyobozi wa Kigali Today, Jean Charles Kanamugire, asubiza ko bishoboka ko iyo miryango nayo ihora ivugana n’abantu bake kandi baba bafite ibindi bibazo byabo bitandukanye n’umwuga muri rusange.

Aba banyeshuri bavuze ko amakuru bahawe n’abanyamakuru bakorera mu Rwanda yerekana ko urubuga rwo gutara no gutangaza amakuru mu Rwanda runoze kurusha uko bivugwa, bakanavuga ko ibyo babona bikwiye kongerwamo imbaraga.

Ibi kandi ni nabyo umuyobozi wa Kigali Today, Jean Charles Kanamugire, yabwiye abo Banya-Canada, aho yavuze ko itangazamakuru mu Rwanda ritera imbere cyane cyane mu buryo bw’amategeko, aho yavuze ko ikigo ayoboye gikora amakuru mu turere twose tw’igihugu kandi bakaba batara bakanatangaza amakuru ntawe ubahohoteye.

Abanyeshuri ba Carleton nabo bavuze ko iwabo muri Canada habaho komisiyo ishinzwe gukurikirana ibibazo by’abanyamakuru nk’igihe bashaka amakuru yihariye, ariko nabo ngo haba ubwo abantu bamwe ariko bacye bimana amakuru. Abo ariko ngo iyo babashyikirije iyo komisiyo ibategeka gutanga amakuru yose arebana n’inyungu z’abaturage. Muri icyo gihugu cyakora ngo abimana amakuru ni bake, kuko abenshi baba bazi ko amategeko yazabibahanira.

Abanyeshuri ba Carleton babajije abanyamakuru ba Kigali Today uko abaturage basanzwe babaha amakuru, abanyamakuru basubiza ko abaturage benshi batajya biyemerera gutanga amakuru ku mugaragaro. Abenshi mu Baturarwanda ngo baba bashaka gusoma no kumva amakuru menshi ariko batayatangaza ngo banatungire agatoki abanyamakuru aho bitagenda babikurikirane.

Professor Allan Thompson yabwiye Kigali Today ko yabaye mu Rwanda akanahigisha itangazamakuru muri kaminuza y’u Rwanda, ariko ngo yasanze Kigali Today ari urugero rwiza rw’uko itangazamakuru rishoboka mu Rwanda kandi rigatera imbere kuko ngo kuba muri buri karere Kigali Today ihafite umunyamakuru kandi ukora ahatuye, akabona amakuru ashaka ntawe umuhohoteye, ngo ni ikimenyetso cyiza ko abanyamakuru bashobora gukora badakomwe imbere.

Aba banyeshuri bari mu Rwanda aho baje kwigira isomo rijyanye n’imikorere y’itangazamakuru mu bihugu bivuye mu mvururu (media in post-conflict societies) bakaba bazanasura ibitangazamakuru binyuranye.

Ahishakiye Jean d’Amour