KT TV
Inzu 51 zatwawe n’umuyaga uvanze n’imvura
Inzu 51 mu Murenge wa Karangazi mu Karere ka Nyagatare zasenywe n’imvura ivanze n’umuyaga, 25 muzi zo zivaho ibisenge burundu, umwana umwe akomereka byoroheje.
Ni imvura yaguye saa munani z’amanywa kuri uyu wa 21 Mata igeza i saa cyenda z’amanywa.
Imidugudu yibasiwe ni uwa Humure, Karangazi, Rubona na Rukundo yose yo mu Kagari ka Rwisirabo.
Mupenzi George, Umuyobozi w’Akarere ka Nyagatare, avuga ko iyi mibare ari iy’agateganyo kandi abo inzu zabo zavuyeho ibisenge burundu bacumbikiwe n’abaturanyi ariko hagiye kwitabazwa imiganda y’abaturage mu gihe Minisiteri y’Ibiza itari yatabara.
Ati “ Aho bimeze nabi bari mu baturanyi, ibiza ntibiteguza, ariko turimo gufatanya na MIDIMAR. Aho bimeze nabi bacumbikiwe mu baturanyi.”
Mupenzi George akomeza avuga ko umwana wakomeretse byoroheje w’uwitwa Kayumba yajyanywe ku Kigo Nderabuzima cya Karangazi akavurwa agataha.
Uretse amazu y’abaturage, izo nzu yasenyutse burundu harimo inzu y’urusengero rwa ADEPER Karangazi na kasho ya Sitasiyo ya Polisi ya Karangazi.
Ibitekerezo
Ohereza igitekerezo
|
|
