Umuco wo kutica akazi, kwitanga no kutihugiraho nibyo Inyumba yazize ubwo yashakaga gukora cyane kugira ngo akorere igihugu cye, bikamuviramo uburwayi ariko ntashobore kwiyitaho agakomeza agakora; nk’uko byemezwa na Perediza Kagame.

Mu muhango wo kumusezera wabereye mu Ngoro y’Inteko ishinga amategeko y’u Rwanda, kuri uyu wa Mbere tariki 10/12/2012, Perezida watangaje ko yamenye Inyumba mbere y’uko urugamba rwo kubohora igihugu rutangira, yagaragaje amateka ye yateye benshi mu bari aho ikiniga.

Perezida Kagame yavuze ko ibikorwa bya nyakwigendera Inyumba bitari iby’iki gihe, kuko ari umugore waranzwe n’ubutwari utaratinyaga kujya ku rugamba rw’amasasu kandi atari umusirikare, ariko agasohoza ubutumwa yabaga atumwe.

Mu ijambo rye ryamaze iminota irenga 30, Umukuru w’Igihugu yatangaje ko yamenye ko Inyumba atamerewe neza mu kwezi kwa kabiri k’uyu mwaka, abibwiwe n’umugore we Jeanette Kagame bakoranaga cyane.

Abayobozi batandukanye basezera ku mubiri wa nyakwigendera Inyumba.

Perezida Kagame yatangaje ko yamusabye kenshi kwiyitaho ariko ntabikore, kuko buri gihe yabaga ashyize imbere gusohoza akazi ashinzwe. Nyuma y’amezi agera kuri atanu, nibwo Perezida Kagame yamusabye kwivuza ku ngufu.

Yagize ati: “Inyumba yari umukada mwiza kandi ufite ibitekerezo bikeye, yari atandukanye n’abandi bayobozi bose tuzi”.

Ibyo yabiheraga ku mirimo yakoze itandukanye muri Guverinoma, irimo kuyobora minisiteri zitandukanye no kujya muri Sena, ariko ugasanga akamaro ke gasumba ibyo yabaga ashinzwe.

Perezida Kagame, kimwe n’abandi bafashe ijambo, asanga ibyo bitagirwa n’umuyobozi uwo ariwe wese. Protais Musoni wakoranye na Inyumba igihe kirekire yemeza ko amateka n’ibikorwa bya Inyumba bikwiye gushyirwa mu gitabo.

Ikibabaza Perezida Kagame nk’uko yabyitangarije, ni uburyo Nyakwigendera Inyumba atabarutse habura iminsi micye kugira ngo umuryango yakoreye wa FPR-Inkotanyi wizihize isabukuru y’imyaka 25 umaze ushinzwe.

Umurambo ya nyakwigendera Inyumba uzanwa mu Nteko ishinga amategeko ngo abayobozi bakuru bawusezeraho.

Inyumba yari yubatse, yarashakanye na Richard Masozera bafitanye abana babiri, yari Minisitiri w’Iterambere ry’Umuryango. Yagiye kuri uyu mwanya avuye mu nteko ishinga amategeko, aho yari umusenateri kuva mu 2003.

Nyakwigendera Inyumba arashyingurwa kuri uyu wa mbere tariki 10/12/2012 i Rusororo nyuma y’amasengesho yo kumusabira yabereye ku rusengero rwa Christian Life Assembly i Nyarutarama.

Inyumba Aloyiziya wari Minisitiri w’iterambere ry’umuryango yitabye Imana mu gitondo cya tariki 06/12/2012 azize uburwayi.

Emmanuel N. Hitimana