Igikorwa cyo kohereza abasirikare bajya mu butumwa bw’amahoro mu gihugu cya Centrafrique cyagombaga kumara ibyumweru bitatu ariko nticyarengeje ibyumweru bibiri bitewe nuko byagaragaye ko ingabo z’u Rwanda zikenewe cyane muri icyo gihugu.

Kuri uyu wa 28/01/2014 nibwo icyiciro cya nyuma kigizwe n’ingabo z’u Rwanda 56 cyahagurutse i Kigali cyerekeza muri Centrafrique. Bitewe no gukenerwa cyane, ngo kugenda bikozwe mu byumweru bibibiri aho kuba bitatu, Brig.Gen Nzabamwita, Umuvugizi w’ingabo z’u Rwanda.

Ingabo z’u Rwanda zigize icyiciro cya nyuma cy’izigomba kujya mu butumwa b’wamahoro muri Centrafrique zuriye indege kuri uyu wa kabiri tariki 28/01/2014.

I batayo y’abasirikare b’u Rwanda 850 bifashisha ibikoresho by’intambara mu kurinda abaturage ariko batarwana (Rwanda Mechanised battalion), ngo yari yateganijwe kujya muri CAR yose imaze kuzura, nk’uko Brig. Gen Joseph Nzabamwita yabisobanuye.

Ati: “Twahise tugerayo abasirikare b’u Rwanda babaha inshingano nyinshi, amahanga abifata neza cyane ndetse na Perezida wa Repubulika yashimye ingabo z’u Rwanda. Ibi bigaragaza isura nziza y’u Rwanda mu mahanga, Abanya-Centrafrique baratwishimiye, baratwumviye aho twabasabye kurambika intwaro hasi, bagakemura ibibazo mu guhura bakaganira”.

Umuvugizi w’ingabo z’u Rwanda yishimira uburyo Ingabo z’u Rwanda zabaye zikigera mu gihugu cya Centrafrique, umukuru w’icyo gihugu mushya Catherine Samba Panza akazitorera kumurinda; “icyo ni icyizere gikomeye twagiriwe”.

Ingabo za Leta zunze ubumwe za Amerika ziri kumwe n’Umuvugizi w’Ingabo z’u Rwanda. Amerika niyo yatanze indege yatwaye ingabo z’u Rwanda muri CAR.

Icyiciro cya nyuma cyagiye kiyobowe na Maj. Senono wungirije umuyobozi wa battalion yose yagiye muri CAR. Ingabo z’u Rwanda zagiye muri CAR mu ndege za gisirikare z’igihugu cya Leta zunze ubumwe za Amerika, nk’uko Brig Gen Nzabamwita anishimira ubufatanye hagati y’ibihugu byombi.

Bitewe n’uko igihugu cya Centrafrique cyasenyuwe n’intambara mu buryo bukomeye, Ingabo z’u Rwanda zanajyanye Kompanyi y’abasirikare b’abubatsi n’ibikoresho bizafasha kubaka no gusana inyubako zangiritse.

Iki gikorwa cyo kubaka bahisemo kugifatanya n’inshingano z’ingabo z’Umuryango wa Africa yunze ubumwe (AU) n’iz’Umuryango w’abibumbye (UN), zishinzwe guhagarara hagati mu ndyane z’abaturage muri icyo gihugu, zishingiye ku madini ya gikirisitu na Islam.

Ingabo z’u Rwanda zajyanye ibikoresho bitandukanye, birimo n’ibyubwubatsi byo gusana ibyangiritse muri CAR.

Amakimbirane mu gihugu cya Centrafrique yatangiye mu kwezi k’Ukuboza 2012, hagati y’Umutwe wa Seleka n’ubutegetsi bw’uwari Perezida Francois Bozize.

Simon Kamuzinzi